Pagtabon sa atong mga bulingon
Atubangan sa hulga nilang Presidential Legal Counsel Juan Ponce Enrile ug Senador Ronald dela Rosa pagpadakop sa langyawng mga imbestigador nga mosusi sa laktod nga pinatyanay sa kampanya sa ilegal nga drugas sa administrasyon ni kanhi Presidente Rodrigo Duterte, moabot sa Pilipinas karong adlawa ang United Nations Special rapporteur sa extrajudicial, summary ug arbitrary executions. Nga di nila ma-posasan.
Di gani nila kababagan ang pagbisita ni Dr. Morris Tidball-Binz. Kay imbitado siya ni Justice Secretary Jesus Crispin Remulla. Kabahin sa pagtabang sa UN pagpanalipod sa human rights sa Pilipinas.
***
Gihapinan nang daan ni Remulla, nahadlok tingali nga sukmatan nilang Enrile, Dela Rosa, ug kanhi presidente Duterte, nga si Tidball-Binz moanhi di isip special rapporteur kon dili isip eksperto sa forensic pathology.
Sa laing pagkasulti, si Tidball-Binz dili imbestigador kon dili magtutudlo. Di siya mo-utingkay sa kaliboan ka extrajudicial killings sa katuigan nga si Duterte ang nagtungkawo sa Malacañang ug sa Davao City Hall. Igo lang niyang tudloan ang mga doktor sa gobyerno. Aron mahimong mas takos sa pagtabang sa kapolisan ug ubang ahensiya sa pagsulbad sa mga kaso.
***
Sa gipahibawo ni Remulla nga mga tigom ni Tidball-Binz, way tambongan sa mga tagtungod sa inosenteng mga sibilyan nga nasaypan nga durugista ug ubang mga biktima sa pagpangyatak sa tawhanong katungod.
Kasagaran sa ikahinabi mga gipasanginlang nanglaktod sa balaod: ??Remulla, Department of Foreign Affairs Secretary Enrique Manalo, Philippine Drug Enforcement Agency Director-General Moro Virgilio Lazo, Philippine National Police Chief Rodolfo Azurin, ug National Bureau of Investigation Director Medardo De Lemos.
***
Bisan di angkunon ni Remulla, ang kinadak-ang rason sa presensiya ni Tidball-Binz maong nakapa-alarma sa UN nga mga pangabuso sa human rights. Kapugngan ba niya si Tidball-Binz sa pagpakisayod nganong wa tarunga og imbestigar ang kapin 30,000 ka patay sa niaging unom ka tuig?
Sama nga di niya katabonan ang mga mata ug dunggan ni Tidball-Binz sa kahibulongang mga panghitabo sa nasud: Mas interesado ang dagkong opisyal pagdupa sa gipasanginlang mga abusado kay sa mga biktima; ug naabtan og lima ka tuig ug duha ka autopsies una nakit-i ang bala sa liog ni Kian Delos Santos, usa sa biktima sa drug war.
- Latest
