Pagsalbar sa dagway sa presidente

Sud sa usa ka semana, gipatuo ta sa administrasyon nga si Presidente Ferdinand Marcos Jr. nibaraw sa ilegal nga sugo sa importasyon sa asukar:

• Gipahibawo sa Malakanyang niadtong Agosto 10 nga way pagtugot sa presidente ang Sugar Order No. 4 pag-import og 300,000 metric tons nga asukar;

• Gipasanginlan ni Senador Imee Marcos niadtong Agosto 11 ang smugglers ug criminal syndicates sa Department of Agriculture nga nangilad sa iyang manghod; ug

• Niangkon si Presidente Marcos Jr. niadtong Agosto 15 nga Oktubre pang importasyon ug 150,000 metric tons ray gikinahanglan.

 * * *

Nihulga ang Malakanyang og imbestigasyon sa palusot sa resolusyon sa Sugar Regulatory Board nga gipangulohan sa presidente isip acting agriculture secretary. Pero hangtod karon way ebidensiya nga smugglers ug criminal syndicates ang nanghawod sa departamento.

Nadasonan hinuon ang mga pangangkon sa Malakanyang tungod sa sunudsunod nga resignasyon sa mga nipirma sa resolusyon nga silang Agriculture Undersecretary Leocadio Sebastian, SRA board member Atty. Roland Beltran ug SRA Administrator Hermenegildo Serafica.

 * * *

Pero inanay nga nabisto nga bakak ang pangangkon sa presidente nga wa pay kanihit sa asukar ug ang pasangil sa Malakanyang nga ilegal ang resolusyon:

• Ang tulo ka higanteng kompaniya sa soft drinks, Coca-Cola Beverages Philippines Inc., Pepsi-Cola Products Philippines Inc. ug ARC Refreshments Corp., nipagawas og hinugpong nga pamahayag nga ang kanihit sa asukar nakaapektar na sa ilang produksiyon; ug

• Ang pag-insistir sa tinuod ni Marcos Jr. sa SRA, Aurelio Gerardo Valderrama Jr., nga gipasubay sa mga lagda ang pagpasar sa resolusyon ug nga igo lang silang nisunod sa hangyo sa presidente.

 * * *

Si Sebastian abunda og detalye sa kanihit sa asukar sa iyang pag-atubang sa House of Representatives. Sukwahi sa pagtuon sa presidente nga sa Oktubre pa magnihit, gibutyag ni Sebastian nga mahurot nang suplay karong buwana. Kay ??530,000 metric tons ang kuwang sa asukar kada tuig: 203,000 metric tons sa raw sugar; ug 332,000 metric tons sa refined sugar.

Si Sebastian, sama ni Valderrama, niingon nga nisunod siya sa “authority” nga gihatag sa presidente. Posible kahang niuyon nang presidente sa importasyon? Pero tungod sa mga hunghong nausab ang hunahuna? Ug nagpagamit sa puhalay sa kahawod sa industriya sa asukar?