Unom ka tuig nga kalbaryo  

Karong nagkaklaro nang ilang kadaogan sa eleksiyon, pinasikad sa plataporma sa panaghiusa nga way detalye, ang pamunoan nilang Ferdinand Marcos ug Sara Duterte nagpakita na og sukwahi nga mga timaan:

- Wa pa nila papahuwaya ang trolls sa social media nga nagpabaha og sayop nga kasayuran ug bastos nga mga panginsulto ug bugalbugal ug pagpanghudlat sa ilang mga kaatbang; ug

- Padayon nga naglikaylikay sa lehitimo nga mga pangutana sa mga sakop sa media sa ilegal nga katigayonan, utang sa buhis ug mga kaso nga giatubang ni Marcos sa Pilipinas ug sa Estados Unidos.

***

Nagdumili si Atty. Vic Rodriguez, tigpamaba ni Marcos nga gihugunhugon nga itudlong executive secretary sa bag-ong pamunoan, sa pagtubag sa pipila ka pangutana sa media ug wa motubag si Marcos og bisan unsang pangutana human sa eleksiyon niadtong Mayo 9.

Timaan nga ang ilang papating pagdumili pagtubag sa seryusong mga pasangil ug pagpasabot sa mga detalye sa hanap nilang mga plataporma, pinaagi sa pagbalibad sa mga debate ug pagpili sa mga sipsip nga interviews atol sa kampanya, padayon nga antuson sa katawhan sa mosunod nga unom ka tuig.

***

Mahimong kopyahon nila ang gihimo ni Presidente Duterte nga pag-ban sa pipila ka reporters gikan sa Malakanyang, pagkiha sa mga sakop sa media nga mangisog pagbisto sa ilang kahiwian ug pagkandado sa mga sibyaanan nga di moyango sa ilang propaganda.

Paglipat sa katawhan gikan sa ?203.8 bilyones nga utang sa estate tax ug mga pasangil sa kawat ug patay, mahimong hatagan og mas dakong importansiya ang taphaw nga mga paukyab sa ilang pagbalik sa Malakanyang.

***

Bisan mahudlat, mahaylo ug mapahilom ang media, sama sa nahitabo sa dakong bahin sa mga pamunoan sa ilang mga amahan, di kapugngan ang katawhan sa padayon nga pagtuki sa kada lakang sa mga anak.

Pero andam nang trolls para nila. Tanang maghisgot sa ilegal nga katigayonan tungluhon nga mga durugista. Tanang mangutana sa extrajudicial killings tawgon nga mga komunista. Tanang moukay sa karaan ug umaabot nga mga eskandalo bunyagan nga dilawan ug pinklawan. Tanang mangahas pagkuwesityon sa pangangkon sa kahiusahan ug kalamboan pakauwawan nga mga itoy sa mga durugista, komunista, dilawan, pinklawan ug, nakatag-an ka, oligarko.