Ambot unsay mas sakit

Ambot unsay mas sakit parang Presidente Rodrigo Duterte:

• Ang pagsukwahi sa iyang anak nga si Davao City Mayor Sara Duterte Carpio sa iyang sugo nga modagan pagka presidente ug nga si Senador Bong Go ang iyang running mate sa piniliay sa Mayo 9, 2022; o

• Ang pag-isnab sa iyang anak, nga nipili nga mag-running mate na lang sa nakauna pagdeklarar pagka presidente nga si kanhi Senador Bongbong Marcos, sa iyang blind item sa presidentiable nga nigamit og cocaine ug sa iyang bantang nga paghulagway ni Marcos nga pro-communist ug huyang.

 * * *

Ambot unsay mas sakit parang Presidente Duterte: Ang naandang pagbawos sa mga puntirya sa iyang tirada o ang gihimo nilang Sara ug Bongbong nga pagsumbalik og pagdayeg niya:

• Giawhag ni Sara ang mga dumadapig sa presidente sa pagsuporta niya ug ni Bongbong sa way paghisgot sa pasangil sa iyang amahan nga si Bongbong ang nihukom para niya sa pag-us-os bisan kon mao untay nag-una sa surveys; ug

• Nipasalig silang Sara ug Bongbong nga ilang ipadayon ug palambuon ang mga maayong nahimo sa iyang administrasyon sa way paghatag og importansiya sa iyang pagsaway.

 * * *

Ambot unsay mas sakit parang Presidente Duterte: Ang pagdumili nilang Sara ug Bongbong pag-apil sa iyang paboritong duwa sa sinabligay sa labing itom ug lang-og nga lapok o ang pagpaka aron ingnon nga nilabay na ang iyang panahon:

• Sa ilang sinultihan ug linihokan gipahinumdoman nilang Sara ug Bongbong ang iyang mga dumadapig nga ang iyang termino mapupos na sa udtong tutok sa Hunyo 30, 2022; ug nga

• Bisan unsa niyang istorya wa nay kahulogan sa pagpili sa sunod nga mga tagduma sa nasud.

 * * *

Ambot unsay mas sakit parang Presidente Duterte: Ang pagkaguba sa plano pagseguro nga duphan siya sa sunod nga administrasyon gikan sa International Criminal Court o ang mas sayo nga pagkawagtang sa iyang influencia sa kaugalingong anak ug mga alyado:

• Bisan nikakak sa iyang hudlat pakigsakbang sa iyang anak pagka bise presidente, nahibawo siya nga kon modaog way gahom si Sara sa pagpanalipod niya; ug

• Bisan palihukong Davao bloc sa Comelec pag-disqualify ni Marcos, nahibawo siyang lisod kumbinsihon ang mga botanteng nailad sa 2016 sa pagpili ni Go sa 2022.