Kinabaratohan ug kinasayonan
Bisan naunhan na sa laing tulo ka bakuna sa Estados Unidos ug Britanya ug mga bakuna sa China ug Russia, giatangan gihapon ang kandidato nga bakuna sa Johnson & Johnson, ang 34-anyos nga kompaniya nga nagbase sa New Jersey sa Estados Unidos, tungod sa duha ka dakong bentaha:
• Una, usa ra ka dose ang gikinahanglan, lahi sa duha ka doses sa nag-unang mga bakuna sa Pfizer/BioNTech, Moderna, ug AstraZeneca; ug
• Ikaduha, magkinahanglan lang og kasarangan nga refrigerator ug tulo ka buwan ang lahutay, mas taas sa nag-unang mga bakuna.
* * *
Laing bentaha sa JNJ-78436735, pasiunang ngan sa bakuna sa Johnson & Johnson, mao ang iyang presyo nga $10 (P480) ra:
• Susama sa kinabaratohang bakuna sa AstraZeneca nga $5 (P240) ang matag dose o $10 (P480) ang duha ka doses; ug
• Katunga sa katunga ra sa bakuna sa Pfizer/BioNTech nga $20 (P960) ang usa ka dose o $40 (P1,922) ang duha ka doses; ug
• Usa ra sa lima ka bahin sa bakuna sa Moderna nga $25 (P1,200) ang usa ka dose o $50 (P2,400) ang duha ka doses.
* * *
Giisip sa mga eksperto nga alas sa bakuna sa Johnson & Johnson mao ang paglaslas sa katunga sa kahasol sa paghakot, pag-apud-apod, ug pagpamakuna, labi na sa layo ug kabos nga mga dapit. Katunga ra sa makinarya ang gikinahanglan ug di na kinahanglan nga mobalik ang mga pasyente alang sa ikaduha nga dose. Busa kalikayan ang gikabalak-an nga kalibog, kalimot ug kaguliyang.
Apan ang kinadak-an nga limitasyon sa bakuna mao nga wa pa mahuman ang clinical trials pagsusi sa ka-epektibo ini.
* * *
Niangkon ang kadagkoan sa Johnson & Johnson nga ang pasiuna nga sangpotanan sa Phase 3 sa clinical trials makuha nila sa tungatunga sa sunod buwan, Pebrero. Kon mapamatud-ang epektibo, unya sa Marso pa sila makapangayo og Emergency Use Authorization (EUA) sa nagkalainlaing kanasuran, apil na sa Pilipinas.
Laing problema nga gikumpisal sa mga tagduma sa Johnson & Johnson: Ang kalangay sa clinical trials nga may 40,000 ka boluntaryo nanukad sa kalangay sa produksiyon sa bakuna sa ilang mga pabrika, nga sa labing uwahi nga pakisusi nauwahi na og duha ka buwan sa ilang target.
- Latest
