Istorya pa lay pangandam sa bakuna
Ang pasalig ni Heneral Carlito Galvez, chief implementer sa National Task Force batok sa COVID-19, nga andam nang tanan kon may bakuna o mga bakuna nga maaprobahan nakabisto sa pait nga kamatuoran: Kutob pa lang sa istorya ang ilang plano sa sunod nga hugna sa pagduma sa pandemya.
Kay si Galvez, lahi sa iyang kaubanan sa Inter-Agency Task Force (IATF), wa maila nga pataka lang og sulti. Apan ang iyang pangangkon sa kaandam sa supply chain ug cold chain sa bakuna batok sa COVID-19 way namisik nga bisan gamayng detalye.
***
Bisan ang labing adunahan nga mga nasud sama sa Estados Unidos nikumpisal nga naglisod sa pagpahimutang sa gikinahanglan nga cold storage facilities kay kasagaran sa nag-unang mga kandidato nga bakuna nagkinahanglan og freezer nga may temperaturang negative 80 degrees celsius.
Sa pasiunang pagsubli, nakaplagan nga ang kinadak-ang cold storage facilities sa Pilipinas nahimutang sa Mindanao nga maoy tinubdan sa higanteng mga isda nga gitumod sa ubang kanasuran. Apan labihan kuwang kon maoy pahimutangan sa mga bakuna. Ambot unsay gipasikaran sa pangangkon ni Galvez sa hingpit na nila nga kaandam.
***
Sa way pagtagad pagpasabot ngano, gilaslasan sa pamunoan ni Presidente Rodrigo Duterte ang P12 bilyones nga gipangayo sa Department of Health aron ipangompra og bakuna sunod tuig. Gihulagway sa mga eksperto nga kuwang ang P2.5 bilyones nga mao ray gitagana sa bakuna.
Apan wa ning kapugong ni Presidente Duterte sa pagpasalig nga mabakunahan ang tanang 113 milyones ka Pilipinhon. Ug wa magtagad paghatag og detalye unsaon sa pagpatuman.
***
Gisalikway ni Finance Secretary Sonny Dominguez, labing sinaligan sa presidente, ang kabalaka nga kuwang ang kuwarta nga ipangompra sa bakuna o mga bakuna batok sa COVID-19. Nipasalig siya nga labing menos P20 bilyones ang igahin sa pagbakuna sa 20 milyones ka Pilipinhon.
Apan dihang gipangutana kon asa kuhaon ang pundo, nibutyag si Dominguez nga utangon nila ang kuwarta gikan sa Land Bank of the Philippines o sa Development Bank of the Philippines. Lisod sabton ngano nga kinahanglan pa ta nga mangutang og para bakuna apan abunda ang waldas alang sa di sama kadinalian ni kamapuslanon nga artipisyal nga pagpaputi sa Manila Bay.
- Latest
