Kinsay mo-imbestigar ni Casas

Hapit tanang gipasangil nga bulilyaso sa pamunoan ni Cebu City Mayor Edgar Labella pulos naglambigit sa iyang tinudlo nga si City Administrator Floro Casas Jr. Napuno sa nagkataas nga listahan ang P2.5 milyones nga tuob kits ug ang pagtukod og minteryo sa bukirang barangay sa Guba bisan wa pay pagtugot sa Department of Environment and Natural Resources (DENR) ug ubang buhatan sa gobyerno.

Sa kasagaran sa mga transaksiyon, nanghunaw si Labella. Tungod ba ni kay salig siyang Casas? O tinuod ang kabalaka nga mas hawod pa si Casas niya?

***

Si Casas ang gitumbok ni Konsehal Gerry Guardo atol sa Arangkada sa Teleradyo Cebu sa niaging semana nga maoy nisugo pagpamalit og tuob kits alang sa Barangay Isolation Centers. Matod ni Guardo ang City Hall ang niduma sa transaksiyon--nangita og supplier ug nitakda sa presyo nga P2,500 matag kit.

Apan nipasabot ang City Hall nga way kuwarta sa gobyerno nga naggasto pagpamalit sa tuob kits. Kay dihang wa pirmahi ni Labella ang mga dokumento nga giandam sa bids and awards committee wa na lang sab magpabayad ang supplier.

***

Hinaot nga makaangkon si Labella og kaisog pag-awhag ni Casas sa pagpasabot nganong nag-una mang pag-apud-apod sa tuob kits kay sa mga dokumento. Kay mao say nahitabo sa tukurong minteryo alang sa mga mangamatay sa Covid-19.

Gipasanginlan si Casas sa pagkaputol sa 389 ka punoan sa kahoy bisan wa pay tree cutting permit, environmental compliance certificate ug protected area management plan nga mo-garantiya pagsunod sa Clean Air Act, Clean Water Act ug Environmental Impact Assessment System Law.

***

Ambot nataligam-an ba lang o nahadlok gyod, wa maapil sa daghang imbestigasyon nga gimando ni Labella ang mosunod:

•Pagpangompra ni Casas og relief goods nga gidudahang overpriced, apil nang sardinas nga tag-P22 ang lata ug bugas humay nga bisan kinsa pay supplier uniporme ang presyo (P2,470.00 matag 50 ka kilo nga sako), nga mas mahal kay sa gipamaligya sa kamerkadohan; ug

•Si Casas say gipasanginlan ni Cebu City Health Officer, Dr. Daisy Villa, atubangan sa Cebu City Council nga nisugo sa City Health Department paggamit og rapid test kits nga wa marehistro sa Food and Drug Administration.