Lumba paghimo og bakuna

Human nipahibawo ang mga siyentipiko sa Estados Unidos ug Britanya nga mahibaw-an na kon malampuson ba ang ilang clinical trials sa mga kandidato nga bakuna batok sa COVID-19 sa Hulyo o Agosto karong tuiga, wa sab papiri ang mga kompaniya sa China nga niinsistir nga mas una ang ilang mga pagtuon kay sila ang unang nahiagom sa labing daghang kaso sa makamatay nga sakit.

Matod sa National Health Commission (NHC) sa China mahimong duna na silay maaprobahan nga bakuna karong Septiyembre, o upat ka buwan gikan karon. Gitakda nga unang dapatan sa bakuna ang kaliboan ka health workers nga maoy labing nameligro nga matakdan sa mga pasyente.

***

Gipahibawo sa China nga duna silay lima ka kandidato nga bakuna nga nagpahigayon na og human trials human nagmalampuson sa pagpamakuna sa mga hayop batok sa kagaw. Gawas sa lima duna pay laing mga kandidato nga bakuna nga nakapasar na sa pasiunang mga hugna ug mahimong magsugod na sab sa human trials.

Matod ni Zeng Yixing, deputy director sa NHC, way dagkong kakulian nga nahiagoman ang 2,575 ka boluntaryo sa nagkadungan nga lima ka clinical trials. Ang phase 2 tests mahimong mahingpit na karong Hulyo.

***

Ang ikatulong hugna sa clinical trials maoy labing mahinungdanon sa pagsusi sa kaluwas ug ka-epektibo sa mga kandidatong bakuna. Kay mas daghan nang boluntaryong mga pasyente ang dapatan sa bakuna ug panid-an kon may panagang na ba batok sa kagaw ug kon wa bay mahiagoman nga dagkong kadaot sa ilang panglawas.

Aron paghimong mas paspas sa pagtuon, mahimong sugdan na ang phase 3 bisan wa pa mahingpit ang phase 2 kon way dagkong suliran nga motumaw. Ang kalamposan sa China pagbadlong sa paspas nga pagkatap sa kagaw mahimong makapahinay hinuon sa ilang pagtuon as posibleng mga bakuna.

 ***

Kay pipila na lang ang mga pasyente sa COVID-19 nga madapatan sa mga kandidato nga bakuna. Maong ang Sinovac Biotech sa Beijing, nga maoy labing unang nakamugna sa kandidatong bakuna, mangita og mga pasyente sa ubang kanasuran nga padayon pang nisulbong ang mga kaso.

Nipasalig sang NHC nga nakabuylo nang higante nilang mga pabrika paghimo og minilyon ka bakuna aron maapud-apod dayon kon mapamatud-an nang makasagang sa COVID-19.