_freeman
^

Mga timaan sa rice cartel

ARANGKADA - Leo Lastimosa (The Freeman) - November 25, 2019 - 12:00am

Kon tinuod nga nangita og ebidensiya si Presidente Rodrigo Duterte sa pagmaniobra sa rice cartel sa suplay ug presyo sa bugas bisan sa Rice Tarrification Law, makatabang tingali ang bag-ong mga numero nga gipagawas sa Bureau of Customs (BOC) ug Department of Agriculture (DA):

•Gipahibawo sa BOC nga karong tuiga niabot na og tulo ka milyon ka tonelada nga imported commercial rice ang nidunggo sa nasud; ug

•Nahibaw-an sa Federation of Free Farmers (FFF) gikan sa DA nga 1.5 milyones ka tonelada ray nasudnong konsumo sa bugas humay matag tuig.

***

Sa ato pa, bisan unsaon nato og kaon og bugas humay hangtod sa makapabusdik nga kataposang panihapon pagsugat sa bag-ong tuig, mabinlan pa ang mga negosyante og katunga sa ilang imported commercial rice. Bisan di na i-apil pag-ihap ang lokal nga ani sa mga mag-uuma.

Sa ato pa, bisan gidayon pang hukom sa presidente pagsuspenso sa importasyon sa bugas humay, nga kaupat niya usab-usaba hangtod nga nisanong sa iyang economic managers nga higpitan lang ang importasyon, may igong suplay sa bugas humay ang nasud hangtod sa Disyembre 2020.

***

Sa di pa motuo ang presidente sa ulug-ulog sa mga opisyal nga naglibot niya nga nibarato nang bugas humay human niya pirmahi ang Rice Tarrification Law, angay niyang sublion ang mosunod nga mga numero:

•Nipasalig ang iyang economic managers nga ang pinatuyangang importasyon makalaslas sa presyo sa bugas humay og gikan sa P7 hangtod P10 matag kilo; apan

•Gibutyag sa Philippine Statistics Authority nga P1 ngadto sa P2 matag kilo ray aktuwal nga us-os sa presyo.

***

Angay sang mahibaw-an sa presidente nga pulos taphaw ang mga pasalig sa iyang mga tinudlo pag-imbestigar sa pagpahimus sa mga negosyante:

•Ang Department of Trade and Industry ug DA igo lang nisaad apan wa g’yuy gihimo nga pagtultol sa mga bodega sa imported commercial nga posibleng gitagoan aron di mohagsa ang presyo; ug

•Ang BOC nipasalig sab paglusad apan wa magtagad pagpahibawo unsay resulta sa pagsubay sa pasangil sa FFF ug ubang kahugpongan nga mas ubos kay sa ilang palit sa ubang kanasuran ang presyo nga gideklarar sa mga negosyante ngadto sa BOC aron makadaginot sa 35% nga buhis.

leo_lastimosa@abs-cbn.com

RICE TARRIFICATION LAW
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with