Kauyonan sa paglabanay

Klaro nga di seryuso si Presidente Rodrigo Duterte sa iyang pag-awhag nga ipatuman na ang 68 anyos nga Mutual Defense Treaty (MDT) sa Pilipinas ug Estados Unidos tungod sa pag-ulbo sa kontrobersiya human sa pagbangga sa barko sa China sa bangka sa Pilipinhong mga mangingisda sa Recto Bank sa West Philippine Sea (WPS).

Kay gikinahanglan tingali ang mas pormal nga deklarasyon kay sa pagtambong og programa sa telebisyon sa iyang kinaham nga pangu og relihiyon, ang “Give Us This Day” ni Pastor Apollo Quiboloy. Di sab katuohan ang iyang sulti nga gipakapinan sa naandan nga bugal-bugal.

* * *

Gisubli sa presidente pag-awhag ang Estados Unidos pagpakatap sa Seventh Fleet nga nagbase sa Japan ug pagdeklarar og gubat batok sa China. Gibalik sab ang iyang pasidaan nga ang Palawan ug ubang bahin sa Pilipinas ang labing magusbat kon may gubat, labi na kon may moulbo nga armas nukleyar.

Niinsistir ang presidente sa iyang pagtuo bisan sa abundang mga ebidensiya nga wa gubata sa China ang Indonesia, Vietnam ug ubang kanasuran nga nisukol ug nga di makigubat ang China ni bisan kinsa kay nagsalig ang ilang ekonomiya sa maayong relasyon uban sa kalibotan.

* * *

Dunay walo ka artikulo ang MDT nga gipirmahan niadtong 1951:

Article I nag-awhag sa Pilipinas ug Estados Unidos sa paghusay sa mga panagsungi sa malinawon nga paagi aron di mahulga ang kalibotanong kalinaw;

Article II nag-awhag sa duha ka nasud sa pagpalambo sa ilang katakos pagsagang sa armadong pangatake;

Article III nag-awhag sa duha ka nasud pagsabot kon may hulga sa ilang nasudnong teritoryo ug seguridad sa Pasipiko;

* * *

Article IV nitataw nga ang bisan unsang pangatake batok sa Pilipinas o Estados Unidos aksiyonan dayon ug ang armadong pangatake isang-at dayon sa United Nations;

Article V nag-apil sa tanang pangatake sa nasudnong teritoryo, kasundalohan, mga barko o mga ayroplano sa Pasipiko;

Article VI nitataw nga ang MDT di makababag sa mga katungod sa duha ka nasud ubos sa UN;

Article VII nagtakda nga ang MDT kinahanglan nga dasonan subay sa mga lagda sa konstitusyon sa Pilipinas ug Estados Unidos; ug

Article VIII nitataw nga ang MDT way kinutoban apan mahimong tapuson sa usa o duha ka nasud.