Daghang salamat sa nakahatag sa gasa sa kinabuhi atol sa Dugong Halad, ang Kapamilya Blood Donation Activity tibuok adlaw gahapon, Sabado, Hulyo 21, sa pito ka dapit sa Metro Cebu. Nagpadayon pa ang kalihokan samtang nagsuwat ko ini ug malipayon ‘ming motaho nimo nga mas daghang dugo ang natigom gahapon kon itandi sa samang kalihokan niadtong Abril karong tuiga.
Kay makahimo man ang blood donors paghatag og dugo matag tulo ka buwan, ang sunod nga Dugong Halad atong ipahigayon unya sa Oktubre karong tuiga. Hinaot nga mas daghang dapit ang atong mapahigayonan.
* * *
Napuno sa isog ug himsog nga blood donors ang pito ka venues sa Dugong Halad gahapon. Labing sayo nga nagsugod sa alas-7 sa buntag ang Chong Hua Hospital sa Mandaue City. Giduma sa Regional Blood Center sa Department of Health ang Robinsons Cybergate sa Capitol Site, Cebu City ug SM City sa Lamac, Consolacion.
Samtang giduma sa Philippine Red Cross (PRC) ang Gaisano Grand Fiesta Mall sa Tabunok, Talisay City; SM City sa North Reclamation Area, Cebu City; Pacific Mall sa Ibabao Estancia, Mandaue City; ug Gaisano Mactan Island Mall Convention Center sa Pajo, Lapu-Lapu City.
* * *
Mga sibilyan, mga polis, mga bombero, security guards ug anti-crime volunteers ang nitubag sa awhag sa paghimo sa dakong sakripisyo ug paghatag sa labing bililhon nga gasa:
• Lisod nang labwan ang gasa kinabuhi, ang matag blood donor nga nihatag og tunga sa litro (500cc) nga dugo makaluwas og hangtod sa tulo ka kinabuhi; ug
• Lisod nang labwan ang sakripisyo sa pag-ula sa dugo aron pagluwas sa mga biktima sa katalagman ug emerhensiya.
* * *
Karon pa lang modapit na mi sa tanang tambalanan, institusyon ug kahugpongan nga may katakos sa pagkuha ug pagtipig og dugo sa pagsalmot sa sunod nga Dugong Halad karong Oktubre 20, 2018. Kon mas daghan ang mopaluyo ug mas sayon ug mas duol ang venues, mas daghan ang dugo nga matigom ug mas daghang kinabuhi ang maluwas.
Ug hinaot nga maibanan kon di man hingpit nang masulbad ang dakong kakuwang sa dugo, segun sa RBC duha ra ang mahatagan sa matag napu ka pasyente nga magkinahanglan og dugo sa Sugbo ug Central Visayas.