Haskang paita ni Cabinet Secretary Jun Evasco. Bisan wa siya nganli ni Presidente Rodrigo Duterte, klaro nga si Evasco ang gitumbok nga sakop sa gabinete nga gitangtangan og gahom tungod sa kahiktin sa panglantaw mahitungod sa suplay sa bugas humay ug sa pagpanghilabot sa mga gimbuhaton sa ubang opisyal sa gobyerno.
Kay wa may laing sakop sa gabinete nga gitangtang sa presidente pagka chairman sa National Food Authority Council (NFAC) tungod sa pagdumili sa dinalian nga importasyon sa bugas humay pinaagi sa gobyerno nga gipamugos ni NFA Administrator Jason Aquino.
* * *
Makapakugang ang pagkatangtang ni Evasco kay gipaluyohan siya sa mga senador ug sa economic managers, nga samtang labihan kagamhanan sa pagpamugos sa Tax Reform for Acceleration and Inclusion (TRAIN) inutil diay batok sa mas pinangga sa presidente nga si Aquino.
Si Evasco suod sab sa presidente. Piskal si Duterte sa Davao City dihang iyang giluwas ang nadakpan nga rebeldeng komunista nga si Evasco, nga gihimong chief of staff sa City Hall dihang na-mayor na ug tagduma sa malampuson niyang kampanya pagka-presidente. Apan mas bilib si Duterte sa rebeldeng sundawo nga si Aquino nga nikumbinser niya pagbanos sa Malakanyang.
* * *
Sama kabakikaw ang kahimtang karon ni Agriculture Secretary Manny Piñol. Kansang pasalig nga mahimo nang rice-sufficient ang Pilipinas karong 2020 gisalikway ni Presidente Duterte nga istorya lang. Bahala na kon abundang ani sa mga mag-uuma ang gigamit sa presidente nga rason pagtaktak sa pangabaga ni Evasco nga si Halmen Valdez niadtong Abril 2017.
Si Piñol, kanhi gobernador sa North Cotabato ug sakop sa media, suod sab sa presidente. Apan samang Evasco napadaplin tungod sa kamadanihon ni Aquino.
* * *
Kon may kaikog silang Evasco ug Piñol, nibiya na unta sa ilang katungdanan sa gabinete. O nitanyag na unta sa ilang resignasyon aron paghatag og higayon sa presidente sa pagpili og laing mga opisyal nga mas kasaligan ug di “hiktin og panglantaw” ni “kutob lang sa istorya.”
Apan abli ang mga mata nilang Evasco ug Piñol sa ilang pagpaluyo ni Presidente Duterte. Way mahitabo nila kon mangluod dayon kay nasuhito unsa kama-usab-usabon ang iyang panghunahuna. Hupo lang una karon kay moabot rang tukma nilang higayon.