Kalbaryo sa business permit
ARANGKADA - Leo Lastimosa (The Freeman) - August 20, 2017 - 4:00pm

Mirisi ang Rico's Lechon. Human sa usa ug tunga ka dekada nga pagtumpi sa dako nilang ginansiya, siyaro wa g'yud makahapsay sa ilang mga dokumento? Sila gihapo'y matulisok bisan kon tinuod pang mga pasangil nga:

•Makaluluoy silang biktima sa panimawos ni Cebu City Mayor Tommy Osmeña tungod sa ilang pagpalayas sa iyang umagad;

•Biktima sab sila sa tokar-tokar nga pagpatuman sa City Hall sa nag-usab-usab nga mga lagda; ug

•Biktima pa g'yud sa nag-alintabo nga kasina sa mga karibal nga naligsan sa paspas nila nga paglapad ug talagsaon nilang kalamposan.

***

Nahibung ang mga suod ni Enrico Dionson, tag-iya sa Rico's, ngano nga mora siyang gahapon pa nagsugod sa negosyo. Nga samtang ang uban nakigsuod sa mga opisyal, nga bisan wa pay mahatag nga pabor karon apan mahimong makatabang sa umaabot, gisalikway na hinuon ang kinakusgan nilang koneksiyon.

Mahimong gitugyan nang Dionson ang negosyo sa duha niya ka anak babaye nga gikatahong di sama kadali nga ikasabot. O tingali nalipat nga ang inilang mga artista ug nasudnong mga politiko nga ilang giulog-ulogan di diay mao ang mohatag og business permit nila.

***

Apan sa tarung nga kalibotan di g'yud unta magkinahanglan og politikanhong koneksiyon ang lehitimong mga negosyo. Di g'yud unta ka magkinahanglan sa umagad sa mayor aron makapalambo sa imong litsonan ug ubang patigayon.

Apan sa tarung nga kalibotan kinahanglan sab kang motuman sa batakan ug makiangayong mga lagda. Di g'yud unta angay nga magsalig sa umagad sa mayor ug ubang mga koneksiyon aron makalusot sa mga lagda nga gitumong pagpanalipod sa panudlanan sa gobyerno ug sa kahimsog sa publiko.

***

Angay sab hinuong sublion ni Mayor Osmeña ang wa kinahanglanang kalbaryo sa pagkuha sa Mayor's Business Permit: Moabot og 21 ang kinatibuk-ang panginahanglan sa tulo ka hugna nga proseso. Maong may mga kompaniya nang nikuha og mga kawani o ni-outsource sa mga kompaniya pag-andam sa mga panginahanglan sa tibuok tuig.

Di kinahanglang mangita si Osmeña og laing sumbanan. Ang Naga City sa Camarines Sur makahatag og mayor's business permit gikan sa 30 minutos ngadto sa duha ka oras. Tungod sa sistema nga igo lang gisunod ni anhing DILG Secretary Jesse Robredo gikan niya.

leo_lastimosa@abs-cbn.com.

Philstar
  • Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with