Ang BADAC makatabang
Ang pagpamaligya og ilegal nga drugas diha sa kabarangayan, dili g'yud molambo kon aktibo lang ang mga opisyal nga mohimo'g lakang aron kini maalkontrahan. Apan unsaon, daghang opisyal sa kabarangayan naghinan-aw lang sa problema, ug ang nakapaet kay ang uban kanila miapil pa g'yud gani sa paghimo'g ilegal.
Gawas sa mga opisyal sa barangay nga nalambigit sa negosyo sa ilegal nga drugas isip protektor sa mga drug lord ug pushers, may mga polis pa g'yud nga gitahasan unta pagsumpo sa mga ilegal nga kalihukan apan nahimo hinoon sila nga escort o bodyguard sa mga drug lord. Base sa mga intelligence report, daghan kanila mga opisyal.
Anam-anam hinoon sila nga napuhag paglingkod na sa katungdanan ni Presidente Duterte kay ang kadagkoan sa kapolisan nahadlok na man nga makuwestiyon kon wala sila'y agresibong kampanya batok sa naghitak nga problema sa drugas.
Bisan gani ang mga sakop sa Philippine Drug Enforcement Agency (PDEA) kaniadto, nagkiyugpos lang ug wala'y gihimo pagsumpo sa pagkuyanap sa gidiling drugas. Dili ikalimod nga kadaghanan sa mga opisyal sa barangay, bisan ang mga kapitan, hadlok nga mohimo'g kampanya batok sa mga pushers.
Nagpatuga-tuga sila sa paghupot sa katungdanan nga sila mga talawan man diay. Sa piniliay, mobubo sila og salapi aron makadaog, kay sigurado man nga mabawi nila ang ilang gasto. Dugay na kaayo nga katuigan nga daghan sa mga kapitan ang naghimo-himo ra og Barangay Anti-Drug Abuse Council pinaagi sa pagsumiter og lista ngadto sa DILG apan ang mga tawo nga kunohay sakop sa BADAC, wala masayod nga sila sakop sa maong grupo.
Kon aktibo lang ang BADAC sa iyang tahas, dili magsilbe ang mga drug lord ug pushers kay malista man ang ilang ngalan ug mahibaw-an kini sa kapolisan kay ang chief of police nagsilbe man nga adviser sa BADAC.
Karon, tahas kini sa mga mayor nga siguroon ninyo nga ang mga BADAC sa inyong mga barangay naglihok g'yud ug dili kay kutob ra sa papel nga gisumiter ngadto sa DILG isip "compliance." Ang BADAC salmotan sa mga lider sa lainlaing homeowners association, principal sa tunghaan nga nahimutang sa barangay, hepe sa mga tanod, konsehal nga nagdumala sa committee on peace and order, ug daghan pa.
Ang kapitan sa barangay mao'y tsirman. Kon 'pakloy' ang kapitan, wala g'yuy mahimo ang BADAC sa kampanya sa drugas. Busa, ikaw COSAP head Garry Lao, trabaho g'yud.
***
Dili kaayo ko pabor nga mangabang lang og garbage truck ang dakbayan sa Sugbo aron mao'y mohakot sa mga basura gikan sa lainlaing dapit sa siyudad ug dad-on kini paingon sa Garbage Transfer Station diha sa Barangay Inayawan.
Sigurado ko nga mas dako kaayo ang magasto sa siyudad niining mao nga paagi kay sa mamalit na lang ang City Hall og bag-ong garbage truck. Ang tinuod, may kuwarta baya ang kagamhanan sa dakbayan sa Sugbo, apan dili lang ipagamit ni Mayor Tomas Osmeña kay gusto man niya nga ipa-revoke ang kontrata sa pagbaligya sa 45 ektaryang yuta sa SRP.
Unta, mausab pa ang hukom ni Mayor Osmeña ug mamalit na lang siya og garbage truck.
- Latest
