Nakabuylo nang playoffs sa National Basketball Association. Bisan wa ka mangutana, mao ni ang akong pataka nga pangagpas: Masakmit sa Miami Heat ang ikatulong sunudsunod nilang kampeyonato karong tuiga pinaagi sa pagpilde sa labing daghan og daog sa regular season, ang way kamatayon nga mga beteranong San Antonio Spurs.
Apan kay pataka ra man ning akong pangagpas, mahimo sang mahitabo ang mosunod: Mas batan-on ug mas lawom nga Indiana Pacers ang manghawod sa Eastern Conference; ug kahatagan na gyod og kinutoban nilang Kevin Durant ug sa Oklahoma City Thunder ang mga damgo sa laing kampeyonato sa nanggungis na nga silang Tim Duncan, Manu Ginobili ug Tony Parker.
***
Wa nay molalis sa katakos ni Lebron James pagpangu sa Heat pagbuntog sa labing seryuso nga mga hulga sa ilang martsa alang sa laing kampeyonato. Hingpit nang gipapas ni James sa NBA Finals sa niaging tuig ang mga pagduda sa iyang determinasyon pag-ilog sa iyang makiangayong luna duol sa kinapungkayan sa kalibotan sa basketbol.
Nabanhaw hinuong kabalaka sa mga dumadapig sa Heat dihang napilde sa 14 sa kataposang 25 ka duwa sa regular season. Wa ba maninuod dihang naklarong di na maapsan ang Pacers sa liderato sa East? O nibalik ang naandang pagkaging? O masaligon lang gyod nga mailang korona bisan unsa pay luna sa playoffs?
***
Usa sa mga timaan unsa katungason ang laing kampeyonato sa Heat mao ang kasayon sa Pacers sa pagbitay sa iwit nga Atlanta Hawks. Nga maoy mopalili nato nahusay na ba o padayon pang nagngutngot ang hilom nga away nilang head coach Frank Vogel ug sa batan-ong sentro nga si Roy Hibbert. Sa mga wa kabantay, usa ka rebound ug singko puntos ray nahimo ni Hibbert sa kataposan nilang engkuwentro sa Heat sa regular season.
Kon mahapuhap nilang Vogel ug Pacers president Larry Bird ang bisan unsang gipangluoran ni Hibbert, angayng manguros na lang daan ang depensa sa Heat.
***
Mas lisod untang tahas sa Spurs sa unang hugna sa playoffs kon wa pa maapsi sa Memphis Grizzlies ang Dallas Mavericks sa ikapitong luna. Tunglo nilang Dirk Nowitzki ug kaubanan ang katag-as ug kadagko ug kahugot sa depensa sa Spurs. Nga mas maglisod unta kon ang mas batan-on pang mga higante nga silang Marc Gasol ug Zach Randolph maoy nanghasi nila.
Apan ang tinuod nga sukod sa kampeyon di ang kahuyang sa kaatbang kon ang kalig-on sa kasingkasing ug panghunahuna. Nga posibleng maoy makapahimo ni Durant nga MVP sa NBA karong tuiga. Ug hinaot nga maoy makapa-semento sa pangangkon ni Lebron nga angay siyang pangitaan og luna duol sa labing masilakon nga mga bituon nilang Michael Jordan, Larry Bird ug Earvin Magic Johnson.
***
Email: leo_lastimosa@abs-cbn.com