CEBU, Philippines — Usa ka ahente sa Philippine Drug Enforcement Agency (PDEA) -7 ang gidakop sa Mabolo Police Station diha sa ilang buhatan diha sa Sitio Sudlon sa Barangay Lahug sa Dakbayan sa Sugbo human giingong gipabuthan og armas ang iyang mga kauban gumikan sa kahubog.
Giila ang maong ahente nga si John Mark Ledesma nga kasamtangan nagpuyo diha sa maong buhatan.
Matud ni Mabolo Police Station Chief Police Major Dindo Alaras nga pasado alas 7 kagahapon sa buntag nakadawat sila og tawag bahin sa usa ka sakop sa PDEA-7 nga nag-wild ug nagpabuto og armas gumikan sa kahubog.
Ang buto sa armas nakapaalarma sa based police sa katupad nga kampo sa Cebu Provincial Police Office (CPPO). Nakuha gikan sa posisyon ni Ledesma ang kalibre .45 pistola nga giingong gigamit sa pagpabuto.
Sumala pang Alaras si Ledesma kauban ang duha ka ahente giingong nag-inom diha sa PDEA-7 compound.
Padayon pa ang gihimong imbestigasyon sa nahitabo, apan matud pa sa pasiunang impormasyon nagkainitay ang tulo nga nisangpot sa pagpabuto og armas ni Ledesma. Matud ni Alaras ang usa sa kauban niini maoy nagsilbi karong complainant.
Unom ka basiyo sa bala ang nakuha sa dapit, nagtuo si Alaras nga makadaghang higayon nagpabuto si Ledesma.
Gisuwayan pagkuha og habig ang kadagkoan sa PDEA-7 kabahin sa nahitabo apan nagdumili sila pagluwat og pamahayag. Iris Hazel M. Mascardo, The Freeman/IBM