Lord, hayagi pa'g gamay
Lord, hayagi pa'g gamay ang bitoon
Nga magtug-an kanamo kung asa ka
Baktasun namu bisan unsa kalayu
Antusun namu ang kauhaw ug kakapoy
Kagutom ug kalisod basta hayagi pa'g gamay
Aron di kami mangapandol ug mangaumod
Hayagi pa ug gamay Lord ang among mga huna-huna
Aron ang among pagtabang sa among mga igsuon
Nagagikan gayud sa among mga kasing-kasing ug maayung intensyon
Ug dili tungod kay ganahan lang mi nga naa napuy bag-ong photo sa FB
O kaha ganahan lang mi makakita sa liki o kaha sa mga natumba nga lubi
Hayagi Lord aron ang among adlaw-adlaw nga pagpuyo
Puno gayud sa katarung ug paghigugma
Hayagi pa ug gamay Lord kay ang langub kung asa kami napasuk karun
Nabulit gayud sa kangitgnit ug mga kwaknit
Hayagi pa ug gamay Lord kay gasige nalang mig kapakung
Dagku na kaayug bukol ang among mga agtang ug bagul-bagul
Wala nay ayu-ayu ang mga samad sa among mga tuhod
Kay wala pa gane mikugan napaksi napud
Lord hayagi pa ug gamay kay murag lami na jud kaayung ipahuway
Kapuy na kaayu ang among mga lawas ug kalag sa sigeg pangita ug lamdag
Usahay lisod na sabton ang mga panghitabo Lord
Maypa mubalik nalangs pagkabata kay para magsige nalag duwa-duwa
Pero Lord hayagi pa intawon ug gamay kay naa pa intawn mi pahumanunon ug eskwela
Ang among mga lolo ug lola amo pa intawong palitan ug tambal sa botika
Ang among mga masakiton amo pa intawong atimanon ug pakan-on
Lord hayagi pa ug gamay, hayagi pa intawon
Kay kung magpadayun nga ngitngit kining among kalibutan karon
Basi'g ang among mga buluhaton dili na namo mapadayun
Hayagi pa ug gamay ang imong bitoon Lord aron ang kahayag makaabot sa tanang su-ok
Suok sa diskuhan, imnanan, buwangan, balay kahilayan, ug sa mga ngi-ob nga suyupanan
Hilabi na ngadto sa mga bulsa nga mibug-at sa kwarta nga gikan sa gilungkab nga alkansiya
Lord hayagi ug gamay aron kaming tanan makakita sa imong panagway
Aron pud makabaton kami ug kalipay nga walay paghupay
Aron inig abot sa pasko kaming tanan manga-on diha sa lamisa nga puno sa kahayag
Nga dili na kami mabalaka pa nga naay hungit nga imbis sa baba sa ilong na hinuon mahisalaag
Intawon Lord, hayagi pa ug gamay…#