Bugal-bugal sa impeachment trial
Nagpaukyab na sab ang mga abogado ni Bise Presidente Sara Duterte sa bag-o lang natapos nga pre-trial conference (PTC) pangandam sa iyang impeachment trial. Atol sa lima ka adlaw nga PTC, kusganon nilang gisupak ang pag-abli sa berdeng kahon sa Bureau of Internal Revenue (BIR) ug sa pag-marka sa sulod niini nga income tax returns (ITRs) niya ug sa iyang bana nga si Atty. Mans Carpio.
Dihang gitak-opan nang PTC, ayha pa sila nipahibawo nga uyon diay sa pag-abli sa kahon. Ubos sa kundisyon nga unya na markahan ang ITRs sa buwag nga executive session. Klarong paglangay ang ilang salida.
* * *
Makapangangkon ang mga abogado ni VP Sara kabahin kini sa inutok nila nga legal strategy. Pero sa daghan nang nangagi nilang mga palusot, lain ning ebidensiya nga dili sila andam sa husay. Maong ila na lang lawgawon.
Nganong nangugat man og lalis sa isyu nga ila diayng giuyonan? Kay determinado si VP Sara nga mokutaw sa proseso ug mag-usik sa panahon sa Senate impeachment court.
* * *
Ilang mga maniobra sukwahi sa gibalik-balik nga pasalig ni VP Sara sa publiko. Nga andam siyang motubag sa tanang mga pasangil, manalipod sa iyang kaligdong, ug mo-atubang sa iyang mga nanggukod niya atol sa impeachment trial.
Ang PTC kabahin na sa impeachment trial. Pero wala gihapon siya mopakita. Nihit ang direktang mga tubag sa mga pasangil. Mas abunda ang technicalities ug paglipat-lipat.
* * *
Ang senator judges dili angay nga magpa-ilad ni VP Sara. Kinahanglan nilang barugan nga ang impeachment trial dili bugal-bugal kondili sagradong proseso sa konstitusyon para sa accountability. Angay siyang posidan-an nga dili mahudlat ang institusyon sa nagka-ubos niyang popularidad ug nagkagamay niyang mga dumadapig.
Angay nga maningil na ang mga magbubuhis. Nga duha ka tuig na nga nagpa-abot og klarong mga tubag gikan niya: Sa katingad-an nga paghatag sa iyang confidential funds ngadto nilang Mary Grace Piattos ug kaubanan, ug binilyon ka pesos nga mga transaksiyon sa iyang bank accounts, nga wala motakdo sa iyang statements of assets, liabilities and net worth. Uhaw ang katawhan sa kamatuoran. Dili sila hangtod sa hangtod nga mag-agwanta sa iyang kahawod pagbalibad sa paghatag og kuwentada giunsa paggasto ang ilang hinagoan.
* * *
- Latest
