Cellphone ban

Sugod karong adlawa, Lunes, Hunyo 29, wala nay mga estudyante sa tanang tunghaan sa lungsod sa Dumanjug sa habagatang Sugbo ang tugotan nga magdala og cellphone sulod sa eskwelahan.

Mao ni mando ni Mayor Gungun Gica ngadto sa tanang mga tagdumala sa mga tunghaan lakip na sa district supervisor sa Department of Education. Sa iyang pahibawo diha sa Facebook, matud ni Gica nga kadtong dili makauyon sa iyang paagi mahimong mobalhin og laing tunghaan gawas sa Dumanjug.

Ang mga cellphone nga masakpan sulod sa tunghaan, embargohon ug unya na tapos sa tuig tingtungha mahimong makuha og balik sa tag-iya. Nanawagan ang mayor sa mga ginikanan ug sa tanang taga lungsod sa Dumanjug nga suportahan ang iyang lakang tungod kay alang ra usab kini sa kaayohan sa ilang mga anak.

Sumala pa sa mayor nga buot niyang ang mga estudyante sa Dumanjug mobasa og libro ug makighugoy-hugoy sa ilang mga kaubang magtutungha inay nga magsigi og apong sa ilang cellphone.

Giklaro ni Gica nga ang iyang pagpatuman og total ban sa cellphone sulod sa mga tunghaan way labot sa nahitabong pagpamusil sulod sa us aka public high school didto sa Tacloban City niadtong miaging semana.

Nagkanayon ang mayor nga lahi ang pagpahugot sa siguridad sa mga tunghaan sama sa pagsiguro nga rikisahon ang tanang mga tinun-an nga mosulod sa eskwelahan ug ang ban sa cellphone. Gipasabot ni Gica nga napugos siya pag-ban sa cellphone tungod kay iyang namatikdan nga makapahingawa ang academic standing sa mga estudyante sa iyang lungsod.

Matud niya nga nabiyaan na pag-ayo ang ilang mga tinun-an ug kinahanglan sila nga mogukod. Ug ang bugtong paagi nga kini mahitabo mao ang pagsiguro nga way disturb sa pagtungha. Gipahibawo sab sa mayor nga ang lungsod migahin og pundo alang sa summer classes ug tinguha niya nga sugod karong Hulyo mopasiugda sila og tutorials sa Math, Science ug English alang sa mga tinun-an sa Grade 1 hangtod sa Grade 12 matag adlaw’ng Sabado. Tinguha sab niya nga ilakip ang pagbasa og Bible ug various formation sa mga tinun-an.

Gawas sa mga estudyante duna say training nga ipahigayon alang sa mga magtutudlo aron pagsiguro nga kalidad gyud ang edukasyon nga makuha sa mga taga-Dumanjug. Mahimong alang sa uban sobra ra ang total ban sa cellphone, apan alang nako husto ang gihimo sa mayor ug hinaot sundon ni sa ubang mga lokal nga opisyal dinhi sa Sugbo.