Rondina balik indoor
MANILA, Philippines — Muling masisilayan ang matatalim na atake ni beach volleyball star Sisi Rondina dahil nagdesis-yon itong muling sumalang sa indoor volleyball.
Kinuha ng Choco Mucho ang serbisyo ni Rondina para sa Premier Volleyball League (PVL) Invitational Conference na papalo sa Hunyo 29.
Malaking tulong si Rondina sa kampanya ng Flying Titans dahil iba ang kalibre nito sa indoor volleyball.
Ito ang unang pagkakataon na masisilayan si Rondina sa indoor volleyball matapos humataw sa beach volleyball sa nakalipas na apat na taon.
Naging bahagi ito ng national beach volley team kung saan nakahirit ito ng tansong medalya noong 2019 edisyon ng Southeast Asian Games sa Maynila at noong 2021 SEA Games sa Hanoi, Vietnam.
Subalit bigo na makapasok sa podium ang tropa ni Rondina sa katatapos na 32nd SEA Games sa Phnom Penh, Cambodia.
Mainit namang tinanggap si Rondina ng kampo ng Choco Mucho.
“From sand to court, are you ready?” ayon sa post ng Choco Mucho sa kanilang social media.
Mas lalong magiging matinik ang Choco Mucho sa pagpasok ni Rondina.
Makakasama nito sa wing position sina Kat Tolentino at Des Cheng katuwang sina middle blockers Maddie Madayag at Bea De Leon at playmaker Deana Wong.
Huling naglaro si Rondina sa indoor volleyball noong 2019 para sa Petron Blaze Spikers sa Philippine Superliga.
Sa kabilang banda, ang dating teammate nitong si Bernadeth Pons ay balik-indoor na rin.
Papalo si Pons sa Creamline Cool Smashers na reigning champion sa PVL Invitational Conference.
- Latest
