GMA, kinilala sa NCCT

Pinarangalan ng National Council for Children’s Television (NCCT) ang GMA Network dahil sa pagbibigay ng dekalidad, angkop para sa mga bata, at makabuluhang programang tumutulong sa pag-unlad ng kabataang Pilipino.

Sa pagdiriwang ng ika-28 anibersaryo ng NCCT sa Pasay City noong Oktubre 24, parehong kinilala ang GMA at ang sister channel nitong GTV bilang Child-Friendly Broadcast Television Stations.

Ang mga Kapuso program na iBilib at Born to be Wild ay binigyan din ng Honorable Mentions sa ilalim ng Child-Friendly Television Programs category.

Samantala, ginawaran ng Posthumous Award ang founder ng Republic Broadcasting System (RBS) na precursor ng GMA, na si Robert “Uncle Bob” Stewart, bilang pagkilala sa kanyang ambag bilang isa sa Pioneers and Champions of Children’s Television mula dekada 60 hanggang dekada 90.

Dumalo sa awarding ceremony sina GMA Program Management Department Senior AVP Concepcion Agnes, Assistant Preview Manager Legrand Tulod, Public Affairs Segment Producer Shilla Anne Esquibel, Program Researcher Arnold Galvez Jr., Senior Preview Coordinator Nikka Garcia, at NCCT Media Monitoring Coordinator Clarisse Ann Dalangin.

Layunin ng event na palakasin ang adbokasiya ng NCCT para sa child-friendly media sa pamamagitan ng pagtutulungan ng iba’t ibang sektor.