Saksi, nagdiriwang ng ika-30 taon!

Ipinagdiriwang ng late-night newscast ng GMA Integrated News na Saksi ang ika-30 taon nito sa telebisyon.

Ito ang pinakamatagal nang tumatakbong news program ng GMA Network.

Unang ipinalabas ang pilot episode ng Saksi noong Oktubre 2, 1995, na pinangunahan ng yumaong broadcast icon na si Mike Enriquez bilang isa sa mga anchor hanggang 2004. Una itong lumabas sa primetime slot bago lumipat sa late-night news block noong 2002.

Pinangunahan ito ng ilan sa mga pinakakilalang personalidad sa industriya tulad nina Mel Tiangco (1996–1999), Vicky Morales (1999–2014), at Arnold Clavio (2004–2024). Nakianib si Pia Arcangel bilang isa sa mga anchor noong Nobyembre 2014, at patuloy na isinasabuhay ang legasiya ng programa sa paghatid ng malinaw at makabuluhang balita.

Sa loob ng 30 taon, nakatanggap ang Saksi ng maraming lokal at internasyonal na pagkilala para sa kahusayan sa balita at produksyon. Ito rin ang kauna-unahang news program sa bansa na nanalo sa Asian TV Awards noong 2000 at sa New York Festivals noong 2003.

Sa paggunita ng tatlong dekadang legasiya, kinilala ni GMA Network Chairman Atty. Felipe L. Gozon ang Saksi bilang pundasyon ng husay sa pamamahayag ng GMA.

Nagpaabot rin ng pagbati si GMA Network President at CEO Gilberto R. Duavit, Jr., na binigyang-diin ang koneksyon ng Saksi sa mga pangunahing halaga ng network.

 Bukod sa mga hard news, sinisikap din ng Saksi na makasabay sa interes ng manonood sa pamamagitan ng iba’t ibang segment tulad ng Barangay Saksi, Sakcess, Saksi Foodie, Tara Game, Showbiz Saksi at Biyaheng Saksi.

Habang tinatahak ng Saksi ang ika-apat na dekada, nananatili itong matatag sa layunin nitong maghatid ng komprehensibo, responsableng, at napapanahong balita para sa bayan.