Rayna Kefaiah

CEBU, Philippines — Ang hugyaw ug ang matahom nga Siyudad sa Sugbo nga masusama sa Singapore maoy usa sa mga gi-highlight sa opening number sa 12 ka mga kandidata  sa Miss Cebu 2023 atol sa  coronation night niadtong Miyerkules sa gabii  nga gipahigayon didto sa  Waterfront Cebu City Hotel and Casino. Nilangkat sa korona isip Miss Cebu 2023 mao  ang 19 anyos  nga Nursing student nga  si  Kefaiah Al-Zair.

Naangkon usab  ni Kefaiah  ang special awards nga Best in Evening Gown-Skin911, Best in Hinablon Dress , Miss Oro Galleria ug Miss Pagcor Charity .

Ang pagtigbabaw sa katungod sa kabataan maoy adbokasiya ni Kefaiah. Matud pa niya nga  nagbunga gyud ang iyang pagpaningkamot ilabi na nga todo balanse usab siya sa iyang oras. Atol sa question and answer portion, gipangutana ang mga kandidata kalabot sa tourism asset sa dakbayan. Gipatigbabaw ni  Kefaiah nga mismo ang mga residente sa Sugbo maoy nag-unang asset niini nga nakatampo sa pag-ugmad sa turismo sa dakbayan.

"The people are the highlight of Cebu because it is the foundation of the tourism aspect that we have here in Cebu, imbued with gratification and harmony. This is who we are as a Cebuano. This is the foundation of Cebu--the Cebuanos,” tipik sa iyang tubag.

Wala katambong ang iyang pamilya atol sa coronation night gumikan sa mga kakulian. Matud pa nga dunay sakop sa iyang pamilya ang kasamtangang naadmit sa tambalanan.

Bisan pa man niini ,padayon nga nagpakalig-on si Kefaiah ug nalangkat gyud niya ang korona. Samtang ang ubang mga mananaog mao sila si Patricia Gail Duenas, (first runner-up), Corinthia Marie Empe (second runner-up), Chynna Julienne Dorado,(third runner-up) ug Nina Danielle Illustrisimo (fourth runner-up).

Ang Kapamilya singer nga si Darren Espanto maoy usa sa guest performer sa maong indigay. Nihatag usab sa hugyaw niya  nga performance mao ang  Cebuana singer nga si Maybelle Padillo.  Nilugwa usab sa maong indigay ang sikat nga banda nga  Wonggoys, ingon man usab ang produkto sa Sinulog Idols nga si Jaymar Ostria ug Rovee Fernandez. Si Miss Earth 2008  Karla Henry  maoy host sa indigay kauban ang award-winning actor/ producer nga si Nico Locco. Nagpasalamat usab si  Konsehal Jocelyn Pesquera kinsa pangulo sa Cebu City Tourism Commission alang sa tanang nakatampo sa kalamposan sa maong indigay. Nasayran nga  usa sa tumong sa Miss Cebu mao ang pag-promote sa mga hiyas sa Siyudad sa Sugbo.