1st Awit Maria
CEBU, Philippines — Human sa makuting pagtimbangtimbang, napili na gyud ang 10 ka song finalists alang sa labing una nga "Awit Maria", ang songwriting contest nga mopatigbabaw sa lapad nga debosyon alang sa Our Lady of Guadalupe de Cebu.
Nasayran nga ubay-ubay ka entries ang giduso sa maong kompetisyon ug gihashasam kini ngadto sa 10 ka song finalists. Ang screeners naglangkob nila ni Cerj Michael,(award -winning singer and composer), Neil Salarda, (award-winning composer), Baby Condeno (Cebuana singer/ actress), Ryan Mark, (Banat News Entertainment Editor), Aljin Abaquita, (Drama Supervisor sa dySS ), ug Andro Banate (Award -winning song lyricist).
Ang finals night mahitabo karong Hulyo 16, 2022 sa gawas nga bahin sa Archdiocesan Shrine of Our Lady of Guadalupe de Cebu sa alas 8 sa gabii.
Ang Top 10 song finalists mao ang Birhen Sa Guadalupe, (Roy E. Tabasa), Inahang Maria (Jay-arr F. Librando), Birhen Sa Guadalupe,Kaloy-i Kami, (Nandy R. Maniwan), Queen of Heaven,(Jundel A. Bacalso ug Katrina V. Bacalso), Sangpiton Ko Ikaw, Birhen Sa Guadalupe,(Jacqueline M. Gabucan), Putli Mo Nga Kasing-Kasing (Richter S. Alegado ug Carlos N. Almario),
Inahan Sa Tanan (John Reille E. Casio), Sa Imong Pagsabwag,(Hardie L. Bigcas), Ode To Our Lady, (Kristian Jason L. Cablao), ug O Maria , Birhen Sa Guadalupe (Emmanuel L. Abellana).
Usa sa mga nagdumala sa maong kalihokan mao ang KC Events ni Cliff Yunson Racuya kun diin tumong niini mao ang pagsabwag sa ka maayo sa Balaang Inahan nga gihimong inspirasyon sa kadaghanan ug pagpaambit sa milagro sa Birhen niadtong gihugpaan sa cholera ang Sugbo, daghang katuigan na ang nilabay.
Nagpaabot ang TV network
Wala pa masayud si Karla Estrada unsay sunod niyang buhaton, karon nga human na ang eleksyon. Suma pa, naglutaw pa ang tanan niyang plano. Apan iyang nahisgutan nga may TV network nga nagpaabot niya. Lakip si Karla sa mga nominees sa Tingog partylist, nga nakaangkon og duha ka luna sa House of Representatives. Third nominee si Karla, busa dili siya makalingkod isip representante.
Mag-singer na
Bisan og nahuman na ang First Lady niadtong Biyernes sa gabii, dili gihapon makapahuway si Sanya Lopez gumikan kay aduna matud pay daghang shows nga gilinya alang niya. Dugang pa, sudlon na sab niya ang recording, ubos sa GMA Records. Ni Sanya pa, angayan matud pa nga atangan ang iyang umaabot nga single nga mag-ulohan og Modern Maria Clara kay makalingaw matud pa ang maong kanta. Si Gabby Concepcion ang leading man ni Sanya sa nahisgutang romantic-series. Una silang nagpares sa First Yaya, ug human sa kalampusan niini, gisumpayan nila kini pinaagi sa First Lady.
Naputol ang bakasyon
Balik trabaho na si Katrina Halili, human siya nipauli sa Palawan niadtong Abril. Gipamulong ni Katrina nga kutob sa Agosto pa siya didto sa iyang probinsya aron makauban ang iyang anak nga si Katie, nga teenager na. Apan malakip siya sa umaabot nga teleserye sa GMA7 nga mao ang Unica Hija nga bituonan nila ni Kate Valdez ug Kelvin Miranda. Makatrabaho sab ni Katrina niini ang Ultimate Male Survivor sa ilang Starstruck batch nga si Mark Herras ug si Buboy Garovillo nga gikan pa sa bag-ong nahuman nga romantic-comedy series First Lady. Mobalik showbiz sab pinaagi sa Unica Hija sila si Biboy Ramirez ug Maybeline Cruz.
Sa September na
September 2022, magsugod ang broadcast sa Advanced Media Broadcasting System (AMBS), nga gipanag-iya ni kanhi senador Manny Villar. Kini maoy gibutyag ni Willie Revillame ngadto sa PEP kagahapon. Usa sa mga top executives sa estasyon si Willie ug maoy nasangunan paghukom unsa nga mga shows ipasalida sa estasyon ug kinsa nga mga personalities ang ilang dawaton. Gitakda sab nga aduna silay partnership sa Viva Entertainment.
Walay isyu uy!
Matud ni Christine Bermas wala silay isyu ni AJ Raval, sukwahi sa intriga nga dili maayo ang relasyon nila gumikan sa pelikula nga Scorpio Nights 3 sa VivaMax. Si AJ gyud ang unang gihatagan niining maong proyekto sa Viva, apan nibalibad siya kay mutungha matud pa siya og kolehiyo, hinungdan nga gihatag kini ngadto kang Christine. Si Mark Anthony Fernandez ug Gold Azeron maoy leading men ni Christine, sa direksyon ni Lawrence Fajardo. Matud ni Christine ngadto sa PEP, nagkaistorya sila ni AJ ug nalipay matud pa kini nga siya maoy nakakuha sa maong proyekto. Gisaad matud pa niya ngadto kang AJ nga buhaton niya ang tanan alang sa ikanindot sa maong proyekto nga mugna ni Peque Gallaga niadtong 1985.
- Latest