Engaged na!

CEBU, Philippines — Hingpit na nga gipahibawo ni 2015 Miss Universe Pia Wurtzbach nga engaged na sila sa iyang negosyante nga hinigugma nga si Jeremy Jauncey. Ang kumpirmasyon ni Pia, giluwatan niya niadtong Biyernes samtang nagbakasyon sila sa Amanpulo.

Apan nagtuo ang netizens nga sa nakalabay nga bulan pa nahitabo ang engagement nilang duha samtang nagbakasyon sila sa Switzerland.

Kini kay sa vlog nga gi-post sa inahan ni Pia mahitungod sa hamubong panahon nga nibista ang magka relasyon didto kaniya sa London, may singsing na nga nakita sa tudlo sa kanhi Miss U winner.

Pero daw dili pa andam si Pia nga ipahibawo kini, sanglit sa ubang mga eksena sa maong vlog, wala na makita ang singsing diha sa iyang tudlo, apan nagpunay siya og hikap sa iyang dughan. Maoy pagtuo sa netizens nga gihimo ni Pia nga pendant sa iyang kwentas ang ilang engagement ring ug maoy iyang gipunayan og hikap sa iyang dughan.

April 12, nigawas ang maong vlog.

Apan niadtong Biyernes, gipahibawo na gyud ni Pia nga engaged na sila. Suma pa niya, nakakita na gyud sila og hustong panahon nga maka celebrate ug makapahibawo sa ilang followers. Kumpleto niyang caption sa iyang post: "We found the perfect place to celebrate and tell you guys..."

Nag-upload si Pia og video nila ni Jeremy nga nagsakay og yate, ug may engagement ring na ang iyang tudlo.

Si Jeremy maoy founder sa creative ug content agency nga Beautiful Destinations. Nagkaila sila ni Pia dihang nag-abot ang ilang mga dalan didto sa Covent Garden sa London. Nakaila si Jeremy kang Pia ug iya kining giduol.

Gaan matud pa ang buot nila sa usag-usa, hangtud nga nagdate na sila. Opisyal sila nga nagkauyab niadtong December 31, 2020.

Dili Makadulot!

Gisalikway ni Miss Universe Philippines 2021 Celeste Cortesi ang posibilidad nga magbuwag sila sa iyang hinigugma nga si Mathew Custodio, kinsa sakop sa Philippine football team. Giisip sa mga mahiligon og beauty pageants nga usa ka tunglo o demalas ang korona sa mga magka relasyon.

Kini kay ubay-ubay na sa mga nakonahan isip representante sa nasud alang sa Miss Universe, nagbuwag ug ang mga uyab human sa ilang kadaugan dinhi sa Pilipinas.

Kini naglakip kanila ni Miriam Quiambao, Janine Tugonon, Catriona Gray, Rabiya Mateo, ug Bea Luigi Gomez.

Apan dili mutuo si Celeste niini. Suma pa niya ngadto sa PEP, gikataw-an lamang nila ni Matthew ang mga komento nga hayan magbuwag sila sama sa nahitabo sa ubang MUP winners.

Matud niya, mas mopalig-on sa ilang relasyon ang iyang korona. Aduna man tuod ingon niini nga panghitabo sa ubang winners, apan dili kini makadulot sa ilang relasyon ni Matthew.

Matud pa sa Fil-Italian beauty, si Matthew ang labing lig-on niyang tigsuporta. Pagsalmot pa lamang niya sa MUP, mao na kini ang tig-abiba niya sa mga higayon nga maguol siya o kapuyon siya tungod sa mga pre-pageant activities.

“Mathew has been so supportive during my journey, that’s just so amazing. Whenever I was stressed, whenever I was going through something, he would always be there to support me and understand.” Padayag niya ngadto sa PEP.

“God’s timing is perfect”

Gitubag sab sa Ginoo ang pag-ampo sa magtiayong Rocco Nacino ug Melissa Gohing. Malisud alang sa professional volleyball player nga si Melissa ang magsabak sanglit aduna siyay polycystic ovary syndrome (PCOS), apan mabdos na siya karon sa unang liwat nila sa kapuso actor. Suma pa ni Melissa, nangayo siya sa Ginoo og bag-ong “purpose”, ug gitubag siya niini. “I asked God for a new purpose in life, and this was His answer. Our answered prayer. God’s timing is perfect.” Gikasal ang duruha niadtong January 21, 2021.

Answered Prayer

Nasurprisa apan nalipay si Dawn Chang nga human sa pito ka tuig niya sa showbiz, bida na gyud siya. Kini pinaagi sa Mother’s Day Special sa Maalaala Mo Kaya, diin ang kinabuhi sa kanhi PBB celebrity housemate nga si Daisy Lopez o mas naila isip Madam Inutz ang gibida. Duha kini ka episodes, diin ang una gipakita na kagabii, ug sa umaabot Sabado ang sumpay. Paambit pa niya: “Akala ko support ulit since lagi ko naman ginagawa yun. Sabi ko, ‘Ah okay kailan at ano ang kwento?’ Sabi niya, ‘Madam Inutz.’ ‘Ay ang galing,’ sabi ko. ‘Ano role ko?’ ‘Ikaw si madam.” Bag-o ra matud pa siyang nag-ampo ug naghunahuna sa posibilidad nga mabida na, ug gitubag dayon siya sa Ginoo.