CEBU, Philippines — Mapasalamaton si Nadine Lustre sa tanang mga grasya nga anaa niya karon ug sa iyang paghiabot sa kun hain man siya nahimutang karon. Taliwala kini sa kamanduan sa korte ngadto kang Nadine nga giluwatan niadtong Lunes nga sundon niini ang nalatid sa iyang kontrata ubos sa Viva Artist Agency.
Sa interview ni Boy Abunda niadtong nilabay nga adlaw, nagkanayon si Nadine: “Being here. Being where I am now. And the mindset that I have now. ‘Cause I’ve learned a lot and I’m grateful for all the things that happened in my life because if it weren’t for those, I wouldn’t be who I am now.” Gibutyag sab niya ngadto kang Abunda nga gisalig niya ngadto sa iyang legal team nga gipangoluhan ni Atty. Lorna Kapunan ang mahitungod sa iyang kaso. “Well, I trust naman that Atty. Lorna can help me out on this and I’m just leaving it up to them.”
Samtang sa usa ka official statement nga gibasa ni Abunda, nideklara og kadaugan si Kapunan batok sa Viva sanglit wala nitugot ang korte sa hanyo niini nga mahuptan ang kinitaan ug bank account sa iyang kliyente.
Giklaro sab ni Kapunan nga walay gipakanaug nga hukom ang korte kabahin sa hisgutanan kun aduna bay balido nga kontrata tali ni Nadine ug sa Viva. Ang resolusyon sa korte niya pa mao nga ipaagi kini og arbitration sanglit walay katungod ang korte niining maong hisgutanan.
“But the issue of whether there’s a valid contract between VIVA and Nadine was not decided by the court which said this issue is subject to arbitration proceedings and not the court.”
Ang Arbitration usa ka pribado nga pamaagi paghusay sa usa ka kasungian nga dili na kinahanglan moagi pa og korte. Mas dali ug sayon kini nga matang sa paghusay.
“Ang Pagbalik…”
Makapahilak inubanan sa nagpahipi nga mga pagtulon-an.
Mao kini ang mga pulong nga naghulagway sa bag-ong teledrama nga sinuwat ug ubos sa direksyon sa media personality nga si Sam Costanilla nga nag-ulohan og “Ang Pagbalik”.
Magtuki kini sa istorya sa usa ka amahan nga naghatag og labad sa iyang pamilya hangtod nga nakaamgo kini sa iyang kasaypanan.
Sa pagsikad karong tuiga, matag buwan na nga nigama og teledrama si Constanilla ug ang latest niya nga project kay gihaom alang sa kasaulogan sa Father’s Day.
Molugwa kini sa Help TV Facebook Page karong Hunyo 20 ( 6:00 pm) , Hunyo 21 (4:00pm) ug Hunyo 22 (8:00pm).
Nalakip sa maong proyekto sila si Dante Luzon, Tess Diez, Dan Lopez, Em Daculan, Atty. Win Prada, Joan Flores, Niña Alaura, Lorenz Evangelio ug Don Emok.
Angayan usab atngan ang special appearance sa Asia’s Timeless Diva nga si Dulce ug ang executive director sa Fort San Pedro nga si Erwin Dela Cerna.
Duna puy partisipasyon ang nag-produce niini nga sila si Lorna Cabasag, ingon man usab ang co-producer nga si Charlita Muego nga tag-iya sa ilado kaayo nga Soul Sierra ug Badjang Restaurant diha sa Barangay Babag 1 sa Siyudad sa Sugbo.
Gipaniguro ni Costanilla nga bisan pa man og makapahinuklog ang dagan sa istorya sa Ang Pagbalik, gipaniguro niya nga aduna kini happy ending ingon man bulawanong pagtolun-an.
Gimingaw sa DongYan
Mas taas matud pa og rating ang replay sa ‘Endless Love” nila ni Marian Rivera ug Dingdong Dantes, itandi sa gihulipan niini nga Heartful Café. Suma pa sa PEP Troika, niadtong June 11 episode, nitala og 13.4% ang Endless Love, mas taas kaysa episode ratings nga naangkon kaniadto sa Heartful Café. Suma pa, daw gikamingawan sa fans ang DongYan sanglit taod-taod na nga walay bag-ong teleserye ang duruha gumikan sa pandemya. Descendants of the Sun ang katapusang teleserye ni Dingdong, samtang Super Maam ang kang Marian niadto pang 2018.
Kataw-anang fake news!
Gikataw-an na lang sa magtiayong Ryan Agoncillo ug Judy Ann Santos ang mga Youtube videos nga nagtaho nga nagbulag na sila. Suma pa ni Juday, dakong fake news ang maong mga video ug gituyo lamang aron makasapi ang mga nagmugna niini. Dili na sila motagad pa og mga ingon niini nga tsika kay naanad na sila nga gisige’g balita nga nagbulag sukad pa niadtong nagkauyab pa lamang sila ug wala pa mahibaw-i sa publiko nga sila na diay. Dose ka tuig na nga kasado sila si Juday ug Ryan. Ang ilang buhaton mao ang pag-post og mga hulagway nilang duha matag karon ug unya aron pagsupla sa maong mga fake news.
Kalagot lang mo!
Hasta si Vice Ganda, pasagdan na lamang ang mga bashers sa ilang relasyon ni Ion Perez. Tulo ka tuig na sila manag-uyab, ug daghan pa gihapon ang magsige og saway nila ug ipamugos gyud ngadto nila ang ilang religious beliefs. Matud ni Vice, daghan na kaayo siya og mga gihunahuna busa dili na lamang niya tagdon ang mga ingon niini nga sirado kaayo og mga utok. Bahala na lang niya pa og maglagot ang bashers, ilaha na kana nga problema. Iya na lang atimanon ang iyang trabaho kaysa magpa apekto pa niini.
Limpyo ang konsensya
Dili apektado si Mygz Molino sa intriga nga gigamit lamang niya ang komedyante nga si Mahal aron mosikat ug modaghan ang iyang Youtube subscribers. Suma pa ni Mygz ngadto sa PEP Cabinet Files, tininuod ang iyang tumong nga makatabang kang Mahal hinungdan nga balewala niya ang mga intriga sanglit limpyo ang iyang konsensya. Giklaro sab niya nga suod lamang sila nga managhigala ug walay malisya tali nilang duha bisan og magdulog pa sila.
Nakapirma na
Pormal na nga gipaila isip bag-ong Kapuso si kanhi Hashtag member Luke Conde kagahapon human usab siya nipirma og kontrata sa GMA7. Gitakda siya nga molugwa sa Wish Ko Lang ug malakip sab sa afternoon drama anthology Status Pumapag-ibig nga "Never Say Goodbye," nga gibituonan nila ni Jak Roberto ug Klea Pineda. Niadtong 2015 nagsugod si Luke sa showbiz pinaagi sa It’s Showtime Hashtags. May mga acting projects siya ug pagbuto sa pandemya, padayon nga nag-host sa Showtime Online U, Si Luke ang ikaduhang Hashtag member nga nibalhin sa GMA7. Ang una mao si Jon Lucas.