Cinco vs Amato ug Gathercole!

Dili kay si Rabiya Mateo lang ang makigtigi sa Miss Universe pageant didto sa Amerika, kundili hasta sab ang mga world-class Pinoy fashion designers.

Kini kay ang Dubai based fashion designers nga sila si Michael Cinco ug Furne One Amato maoy evening gown designers sa tulo ka mga kandidata sa nahisgutang indigay sa kaanyag nga giisip nga labing prestihiyoso sa tibuok universe.

Kumpirmado nga si Furne One, kinsa kaliwat og taga Cebu, maoy nagmugna sa evening gown ni Rabiya para sa preliminary competition ug sa coronation night mismo. Ikaduhang higayon nani ni Rabiya nga musul-ob og mugna ni Furne One sanglit ang nahisgutan maoy designer sa official swimwear sa Miss Universe Philippines pageant sa nilabay nga tuig.

Samtang si Cinco maoy nagmugna sa gown nga isul-ob ni Miss Universe Canada Nova Stevens sa maong indigay. Suki na si Cinco sa Miss Canada sanglit ang ilang national pageant director nga si Denis Davila, higala niini.

Niadtong Lunes sab, Miss Universe Romania Bianca Tirsin nipahibawo sa ABS-CBN News nga si Cinco sab ang iyang designer.  Suma pa niya, nagpadala og mensahe kaniya si Cinco aron pasul-ubon siya sa mugna niini.

"I am incredibly happy that he personally sent me a direct message asking me to wear one of his creations.

"It’s an honorable thing for me and I will be happy not to disappoint him and to wear also the Miss Universe crown!" Tipik sa mensahe ni Tirsin nagkanayon.

Samtang, gipahibawo ni MUP Creative Director Jonas Gaffud nga ang nipanaw nga world-class designer sab nga si Rocky Gathercole ang nagdesinyo sa national costume ni Rabiya. Si Gathercole nakit-ang patay didto sa iyang panimalay sa Quezon, City niadtong March 3, 2021. Gituohan nga heart attack ang nakaingon sa iyang kamatayon.

Ang mga Pinoy nga sila si Gathercole, Furne One, ug Cinco dili mga basta basta og lineup sa international clients.

Lakip sa nakasul-ob sa mga mugna ni Gathercole sila si Britney Spears, Cardi B, Nicki Minaj, ug Jennifer Lopez.

Suma pa sa Wikipedia.com, lakip sa mga international celebrities nga nakasul-ob na og obra ni Cinco sila si Beyonce, Rihanna, Lady Gaga, Carrie Underwood, Kylie Minogue, Britney Spears, Christina Aguilera, Ellie Goulding, Nicole Scherzinger, Aishwarya Rai, Fergie Ferguson, Dita Von Teese, Brandy Norwood, Ashanti, Chris Brown, Tyra Banks ug Naomi Campbell.

Samtang sila si supermodel Heidi Klum ug Tyra Banks singing sensations nga sila si Beyonce, Katy Perry, Jennifer Lopez, Nicki Minaj, Shakira, Nicole Scherzinger ug Jessie J. ang lakip sa mga kliyente ni Furne One.