Aktres, kasama na sa koleksyon ng mga babae ng aktor!

Napakabilis kumalat-umikot ang kuwentong natuldukan naang dating nilalanggam na relasyon ng isang showbiz couple. Kung gaano sila kalambing nu’n sa bawat isa ay hiwalayan agad ang istor­yang pinagpipistahan tungkol sa kanila.

Malaking palaisipan para sa marami ang lumabas na balita, ano raw kaya ang ­naging da­hilan ng kanilang hiwalayan, palagi na lang daw bang ganito ang magiging takbo ng pakikipagrelasyon ng hunk actor na bumibida sa kuwento?

Reaksiyon ng isang source, “’Yung pagbubura ng mga pictures sa account, isang sign na ‘yun na may problema talaga ang magkarelasyon. ‘Yung pag-unfollow ng isa sa kanila sa account ng isa, lalong malinaw na reason ‘yun na may problema nga sila.

“Kapag ganu’n ang nangyayari, naiisip talaga ng mga fol­lowers nila na meron ngang problema!” unang kuwetong a­ming source.

Ganu’n mismo ang nangyari sa magkare­lasyon. Binura ng sexy female persona­lity ang mga retrato nilang magkasama ng hunk actor na palatandaang meron nga silang pinag­dadaanang problema ngayon.

Balik-chika ng aming impormante, “Nakakaawa naman ang girl kung totoo nga ang kuwentong umiikot ngayon. Napabilang din siya sa collection ng male personality.

“Palagi kasing ganu’n ang takbo ng pakikipag­re­lasyon niya, napakainit sa una, pero biglang lumalamig na sa bandang huli. Ganu’n din ang nangyari sa mga dati niyang karelasyon, di ba?

“Nakakalungkot naman kung totoong tapos na sila. Kasalan na ang pinag-uusapan nila, di ba? Kesyo sabi pa ng male personality, e, kasa­ma sa plano niya ang kasalan kaya nagpapatayo na siya ng mansiyon.

“Anyare? Talaga kayang wala sa bo­kabu­laryo ng lala­king ‘yun ang pagpapa­kasal? Hanggang sa kuda nga lang kaya siya? Hanggang  sa  plano lang?” napapailing na ko­men­to pa ng aming source.

Tahimik pa ang dalawa hanggang nga­yon, hindi pa nila sinasa­got ang tanong ng ba­yan kung ano ang nangyari sa kanila, pero puwede silang gumawa ng senaryo tungkol sa nangyari.

Huling reaksiyon ng ­aming source, “Baka naman kasi umaasa pa sila sa pagbabalikan, kaya  wala pang nagsasalita sinuman sa kanila. Baka ang palalabasin nila, e, nagbawas­lang ng collection ng pictu­res nila ang girl sa IG, alam na this!

“Huwag naman sanang totoo ang kuwento. Nakakaawa talaga ang girl. Mapapasama rin siya sa hilig mangolekta ng girlfriend nu’ng male personality na pakaka­salan kuno, pero hindi naman pala!” huling komento ng napapailing naming source.

Ubos!

Mga artistang nagkakawanggawa, naglalabas ng sariling pera

Napakahirap ng sitwasyon ng mga artis­ta. Palib­hasa’y maganda ang kanilang kinikita ay parang gi­na­gawa nang obligasyon para sa kanila ng ibang tao ang pagtulong sa ating mga kababayan kapag dinadalaw tayo ng mga kalamidad.

Parang ang tingin sa kanila ay mga pulitiko silang may binitiwang pangako sa kanilang mga nasasakupan nu’ng kampanya. Hindi puliti­ko ang mga artista.

Wala silang obligasyong magbi­gay ng ayu­­da at alamin ang mga panguna­hing pangangailangan ng mga naging bik­­tima ng kala­midad, hindi sila serbisyo-pub­liko, eksten­siyon lang ng pagi­ging ma­katao nila ang ginagawa nilang pagtulong.

Maraming salamat dahil  may mga per­so­nali­dad na tulad nina Wil­lie Revillame, Raffy Tulfo, Angel Locsin, AiAi delas Alas, Bela Padilla, Heart Evangelista at iba pang mga artis­tang may busilak na puso sa pagtugon sa mga panga­nga­ilangan ng mga nagdarahop nating kababayan.

Kusang-loob nila ‘yun, hindi obligasyon, magpasalamat na lang tayo na may mga artistang bukas ang puso at palad sa pagmamahal at pagmamalasakit sa mga Pilipinong inuulaol ng kalamidad.

Huwag nating ipapasan sa kanila ang krus ng pagtulong, pasalamatan na lang natin sila, dahil kahit wala naman silang upuan sa gobyerno ay nagbibigay sila ng ayuda.

Tumutulong sila sa ating pamahalaan para kahit paano’y gumaan ang sitwasyon pero ang ipa­ako sa kanila ang pagtulong ay kalabisan na.

May sarili rin silang mga problema. Ang iba nga sa kanila’y biniktima rin ng kalamidad, nanga­nga­ilangan din sila ng tulong, pero sinasarili na lang nila ang pagbangon.

Huwag natin silang hanapan, hindi sila ang mga tamang tao para kuwestiyunin kung nasaan na ang kanilang tulong o kaya’y kulang pa, wala silang inookupang posisyon sa ­ating pamahalaan.

Salamat na lang sa mga artistang may mabubuting puso, naglalaan sila nang sapat na panahon sa pag-ayuda, naglalabas ng sarili nilang perang pinaghirapan dahil ‘yun ang dinidikta ng kanilang puso.