Paglahutay sa kinabuhi

CEBU, Philippines — Dako na nga grasya alang sa 16-anyos nga si Daniela ang mahatagan og ikaduhang kinabuhi human nga nakasinati sa maong delikado nga sakit nga cancer nga dili sarang maangkon sa mga bata nga dili pa hamtong sa pangidaron.

Dili babag ang gihambin nga balatian aron padayunon ang mga laraw sa  kinabuhi. Gani, ang pagsalig sa Ginoo ang nahimong alibyo sa cancer survivor nga si  Daniela Dela Pisa.

Mao kini ang istorya sa kinabuhi sa garbo sa Sugbo sa natad sa gymnastics nga si Daniela, kinsa nakapanghakot og gold medal ug duha ka bronze medals sa bag-ohay lang nga natapos nga Southeast Asian Games 2019 nga gipahigayon didto sa kauluhan .

Karong panahona, usa gyud siya nahayagan sa spotlight busa nagsidlalsidlak gyud ang iyang pangalan.

Dako na nga grasya alang sa 16-anyos nga si Daniela ang mahatagan og ikaduhang kinabuhi human nga nakasinati sa maong delikado nga sakit nga cancer nga dili sarang maangkon sa mga bata nga dili pa hamtong sa pangidaron.

Sa pagtikang ni Daniel sa online show nga The Freeman Conversations kauban ang iyang amahan nga si Randy Dela Pisa, gipadayag niini nga  2008 nasayran nga aduna siya'y sakit human nga nasikaran ang iyang tiyan sa iyang maguwang dihang nag-away ang duruha.

Matud pa niya nga dali nila nga gidala sa tambalanan si Daniela aron nga ipa-checkup ug obserbaran.

Enero 2009, kalit nga migahi ang iyang tiyan, busa nibalik sa tambalanan og gitambagan sa doktor si Daniel nga magpaubos og operasyon.

Unya, gipailawom sab siya si Daniela og chemotherapy balig upat sa session sulod sa tulo ka semana.

Gihatod si Daniela sa Placer, Masbate, ang yutang natawhan sa iyang amahan, aron nga makahanggab og presko nga hangin ug maka-recover .

Human sa duha ka tuig nga pagpahuway ni Daniela, gibalik siya sa Cebu sa iyang pamilya ug nibalik pagbansay-bansay sa rhythmic gymnastics.

Nagsugod siya sa pagkat-on sa maong butang  sa edad nga 4 anyos ug mibalik siya sa maong duwa sa edad nga 7 paingon na sa 8 anyos.

Sa pagbalik ni Daniela, inanay na sab nga miabli ang dakong pultahan sa kahigayunan kun diin inanay nga nabaid ang iyang katakus.

"Dili nako mauwaw kaayo sa time nga magsugod nako og gymnast. Positive lang kay kung mag-isip ka og negative kay matagak ang aparatus. Magtan-aw ko sa mga tawo, dili ko ganahan shagitan kay makuyawan ko kay mapressure ko sa cheer,” matud pa niya.

Ang iyang inahan nga si Darlene Dela Pisa ang iyang unang trainor, hangtud nga napun-an kini og us aka Pinoy nga tua na nagbase sa Hungary.

Mulungtad og unom ka oras matag adlaw ang iyang pagbansay-bansay, busa home school lang siya pagkakaron.

Suma niya, seryoso gyud ang iyang mga tinguha sa gymnastics. Dako ang iyang pasalamat nga aduna siya'y lig-on nga support system aron mas malig-on sab ang iyang pagsalig sa iyang kaugalingon.

Nagmaya ang pamilya ug ang tanang nagpaluyo ni Daniela sa iyang kadaugan sa SEA Games sa kategorya Rhythmic Gymnastics nga gilangkuban sa Balls, Clubs ug Hoops.

Si Daniela ang labing una nga Pilipino nga nakaangkon og gold sa nahisgutang kategorya.

Gawas sa maong kadaugan, nahimo na sab nga back-to-back Most Outstanding Athlete in the National Milo Olympics si Daniela niadtong 2013 ug 2014.

Karon, buot una niya nga mopahuway sa makadiyot apan dili niya hikalimtan nga magbansay-bansay pagbalik gumikan kay aduna pa'y nakalinya nga mga sangka karong Pebrero 2020 sa Europe.

Dugang pa nga mosalmot pa siya sa Captain's Cup, Asian Games, ASEAN School Games ug laing sangka na sab sa Singapore.

Mao nga higpit karon si Daniela sa iyang diet aron nga mamaintain niya ang iyang gibug-aton.

"Kaon lang gyud ko og chicken, vegatables, fruits ug brown rice,” matud pa niya.

Tambag pa ni Daniela nga disiplina ug paghatag og pokus sa gibuhat ang sekreto ang naghatod kaniya sa iyang nahimutangan karon ug bisan pa man sa kalisdanan nga iyang nasimati ug masinati pa, kanunay lang gyud niya ang sangpiton ang Ginoo aron nga makalahutay sa dalan nga iyang agian.