Rayna na sab ang Pinay

CEBU, Philippines — Narayna ang pambato sa Pilipinas sa Miss Tourism International pageant nga gipahigayon didto sa Kuala Lumpur, Malaysia niadtong Biyernes.

Siya mao si Cyrille Payumo, kinsa nakalangkat sab sa minor award nga Best in National Costume.

Nikabat ngadto sa 38 ka mga kandidata ang gipilde ni Cyrille.

Ang ubang mga mananaog mao sila Gabriella Patricia Mandolang, (Indonesia), Miss Tourism Queen of the Year International; Kateryna Kachashvili, (Ukraine), Miss Tourism Global; Joanna Babynko, (Poland), Miss Tourism Cosmopolitan International; ug  Chan Sotima, (Cambodia), Dreamgirl of the Year International.

Kahinumduman nga first runner-up lamang si Cyrille sa gipahigayon nga Mutya Pilipinas pageant sayo niining tuiga. Ang nidaog gyud isip Mutya Pilipinas Tourism International mao si Tyra Goldman, kinsa gibawian og korona gumikan sa iyang dual citizenship.

Si Cyrille mao ang ikalimang Pinay nga nidaog sa maong indigay sa kaanyag. Ang ubang winners mao sila Jannie Loudette Alipo-on (2017), Angeli Dione Gomez (2013), Rizzini Alexis Gomez (2012), ug Maria Esperanza Manzano (2000).

Tuig na diay

Usa ka tuig na matud pa nga engaged sila si Sarah Geronimo ug Matteo Guidecelli suma pa sa manghud sa nauwahi. Gumikan niini, natubag ang pangutana sa netizens nganong gitugutan na matud pa nga mobiyahe si Sarah kauban kang Matteo nga wala iyang inahan o bantay.

Nisamot ang bashing

Human sap ag-walkout ni Asia’s Phoenix Morisette Amon sa usa ka birthday show diin guest unta siya niadtong Miyerkules, nikatap ang mga hulagway niya kauban ang iyang boyfriend nga si Dave Lamar samtang nangaon kuyog usab ilang mga higala. Gumikan niini, nisamot ang bashing nga nadawat ni Morisette nga nagkanayon, nag-inarte ra gyud ang singer dihang ni-walkout siya sa concert.

Romcon project

Tulo ka mga pelikula ang gilinya sa Triple A management alang sa labing bag-o nilang talent nga si Kisses Delavin kinsa produkto sa ABS-CBN’s Pinoy Big Brother ug nipirma ug nipirma na og kontrata sa maong agency niadtong Lunes. Nagdumili pa ang APT pagtug-an kinsay mamahimong leading man ni Kisses apan romance-comedy matud pa kini.

Bag-ong ka-loveteam

Apan kun wapa mabutyag kinsay mapares ni Kisses, ang kanhi niya ka loveteam sa ABS-CBN nga si Donny Pangilinan aduna nay bag-ong partner. Kini mao ang kanhi child actress ug karong Star Magic Batch 2019 member nga si Belle Mariano. Ang duruha maoy magpares  sa bag-ong Iwant series nga “He’s Into Her.”

Ipapriso ni Angelica

Naghurumentado si Angelica Panganiban sa Twitter kay matud pa gihasul sa usa ka French driver ang iyang igsuong babaye, pag-umangkon ug bana niini. Matud pa, gipangayuan og P25, 000 ang grupo sa iyang igsuon gikan sa airport paingon sa istaran nila samtang nagbakasyon. Nagdumili sila pagbayad gumikan kay mahal ra kaayo kini.

Gihapak matud pa sa driver ang kamot sa ate ni Angelica human nakakita nga nag-picture kini. Hinuon, na okay na kay gitabangan sila sa mga Pinoy didto nga maka report sa police. Apan nibahad si Angelica nga pangitaon gyud niya ang maong driver aron ipapriso.