Vic ug Pokwang subling magpares

CEBU, Philippines –Gipaila-ila na ni Vic Sotto ang iyang  leading lady sa umaabot niya nga entry  sa 2019 Metro Manila Film Festival nga “Mission Unstapabol:The Don Identity.”

Makapares niya sa maong pelikula ang Kapamilya star nga si Pokwang.

Katapusan sila nga nagpares nahitabo niadtong 2011 pinaagi sa pelikulang “Pak! Pak! My Dr. Kwak” .

“May lips to lips kami dito. Lalagyan ko siya ng kissmark sa gilagid, malalala ‘to malalala,” suma pa  ni Pokwang.

Nalakip pud sa  “Mission Unstapabol: The Don Identity” sila si  Jake Cuenca, Wally Bayola, Tonton Gutierez ug Maine Mendoza.

Suparurk nadutlan

Niduso og reklamong cyber bullying   si Miss Grand Thailand 2019 Coco Arayha Suparurk batok sa tulo ka  Internet users  nga matud nipadangat og dili maayong pulong kaniya.

Suma pa ni Suparurk nga  nahagba gyud siya sa mga gipanulti sa iyang bashers.

Kahinumdoman nga  nakadawat og mga pagsaway si Suparurk human niya gitawag og “fat”  si Miss Universe 2018 Catriona Gray.

Wala’y safety officer

Sa pasiuna nga imbestigasyon, gibutyag sa secretary sa  Department of Labor and Employment nga si Silvestre Bello III nga dunay pagkulang sa safety requirement ang GMA Network atol sa pagka-aksidente ni Eddie Garcia sa usa ka show niini.

Base sa  findings sa  Occupational Safety and Health Center nga wala’y safety officer sa set sa maong programa sa GMA  nga usa unta kini sa mga  requirement.

Una na nga nasuta nga naaksidente  si Eddie sa set sa Rosang Agimat human kini nabitik sa kabli  nga miresulta sa pagkatumba sa aktor.

Niistar og pipila ka adlaw si Eddie sa tambalanan sa wala pa  kini nakabsan sa  iyang kinabuhi niadtong June 20 .

Nawagtang  nga dress  nakaplagan

Human sa pagpinangita sulod sa pipila ka tuig,  nakit-an na gyud sa  London-based Filipino designer  nga si Lesley Mobo ang nawagtang  niya nga  dress .

Nasurpresa siya nga gisul-ob   kini ni  Miss Universe Philippines 2019 Gazini Ganados.

Suma pa ni Lesley nga siya ang nagmugna sa sparkly red dress nga gisul-ob ni  Ganados sa usa ka  photo shoot.

“What would you do if you find your missing archive dress suddenly being worn by a beauty queen and you’re not even aware of it, and not being credited?”  suma pa sa Facebook post  ni Lesley.

Sa lain niya nga  post,  gi-share usab ni Lesly ang screenshot sa usa ka online shopping website nga maoy nagbaligya sa iyang dress.

“Omg someone just sent this to me. Someone out there is letting [people use] or selling this gown? But with a retail price? How come? Hindi naman for sale ang damit? What website is this, please? Can I buy it privately?” suma pa sa iyang post, ug iyaha na kining gi-delete.

Sa  lain niya nga post, tataw nga nahuwasan na si Lesly  ug nag-post siya og ,”Apology accepted.”

Maine gikilig sa Kathden

Nakatan-aw na si  Maine  Mendoza sa pelikula nila ni Alden Richards ug Kathryn Bernardo  nga Hello, Love, Goodbye.   Gikilig si Maine sa tandem nila ni Kathryn ug Alden.  “Maganda siya. Magaling silang dalawa, tapos napapakilig ako,” suma pa ni Maine.

Unsa man  gyud?

Tak-om gihapon ang kampo nila ni Ellen Adarna ug John Lloyd Cruz kalabot sa isyu nga nagbuwag na sila.  Una na nga nitumaw ang taho nga niduso matud pa og temporary protection order si Ellen batok kang Lloydie.   Nakugang ang fans sa duha sa maong isyu.

Makauban si Tito Boy

Dakong garbo alang kang Nadine Lustre nga makauban niya sa trabaho ang respetadong talk show host nga si Boy Abunda.  Nalakip ang mga pangalan nila ni  Nadine ug Boy isip mga hurado sa reality show nga Your Moment.

Mga pelikula nagbaha

Mapasalamaton kaayo  si Kakai Bautista sa mga tawong nisalig gyud sa iyang abilidad isip komedyanteng aktres. Nasayran nga nagsagunson ang iyang movie projects. Nalakip si Kakai sa pelikula ni Ai Ai delas Alas nga “And Ai Thank You”  Nilugwa usab si Kakai sa  pelikulang Family History  sa GMA Pictures,  ug Hello, Love, Goodbye sa Star Cinema.

Go Victor!

Nitabang gyud  si  Victor Neri sa creative team sa bag-ong Kapuso primetime series  nga Beautiful  Justice. Nalakip sa maong teleserye sila si  Yasmien Kurdi ug Gabbi Garcia.  Gipaneguro  ni Victor nga hugyaw ang mahimong output sa maong proyekto.

Naamong sa isyu

Nagkatawa sila si  Gretchen Ho ug  Gretchen Fullido gumikan kay nadamay ang pangalan nila  sa isyu  nga gikalambigitan nila ni Gerald Anderson, Julia Barretto ug  Bea Alonzo.   Dunay pipila ka netizens ang nagpadala kanila og mensahe ug giyawyawan sila niini gumikan kay matud pa nag-apil apil sila sa isyu.  Nasuta nga nasayop ra diay ang netizens sanglit ang bout nilang padalhan og mensahe mao ang iyaan ni Julia nga si Gretchen Barretto kinsa nidapig kang Bea.

Dili hugawog  huna-huna

Gitataw ni Edward Barber nga dili niya hatagan og malisya ang kasoud nila ni Maymay Entrata ug Donny Pangilinan.  Susama sila nga artista busa nakasabot ra siya tagsa-tagsa nila nga trabaho.

Naglikay?

Nitumaw ang istorya nga naglikay  si Dennis Padilla nga pangutan-on kalabot sa isyu nga giatubang sa iyang anak nga si Julia Barretto hinungdan nga wala kini molugwa sa presscon sa pelikula nila ni Ai Ai Delas Alas nga  “And Ai Thank You”.

Uyon sa sequel

Uyon  si Alden Richards  sa sugyot nga himoan og sequel  ang pelikula nila ni Kathryn Bernardo nga   ‘Hello, Love’ Goodbye’ sa Star Cinema. Padayon nga gilinyahan sa mga sinehan ang maong pelikula.

Lloydie misaad

Gisaad ni John Lloyd Cruz nga mohimo gyud siya og  comeback film ubos sa direktor nga si Cathy-Garcia Molina. Una na nga gipadayag sa direktor nga andam gyud siya makatrabaho og balik si Lloydie sa dili pa siya hingpit nga moretiro sa pagama og pelikula.