Anne nang-hugyaw sa audience

CEBU, Philippines — Nakakuha gyud og igong atensyon si Anne Curtis ug mas gipakpakan gyud siya sa mga tawo sa Araneta Colisuem sa nahitabong Binibining Pilipinas Coronation Night. Daghang miingon nga nanghugyaw gyud si Anne sa mga tawo matag commercial break sa dihang irampa niya ang mga gown nga mugna sa mga nabantog nga mga designer nga sila si Patty Ang, Micheal Layva ug Michael Cinco. Si Anne ang usa sa mga host sa maong indigay kauban sila si Nicole Cordoves ug Richard Gutierrez.

Pasagdan nalang

Matud pa ni Loisa Andalio nga iya nalang pasagdan ang iyang bashers gumikan kay bisan og unsa ang iyang buhaton, hukman gihapon siya. Dugang pa niya nga ipadayon lang niya ang iyang trabaho gumikan kay mao gyud kini ang tumong nganong misulod siya sa showbiz aron motrabaho ug dili magpadala sa mga istorya sa mga tawo.

Nasangit sa tubag

Dismayado gyud si Binibining Negros Occidental candidate sa  Binibining Pilipinas 2019 nga si Vickie Rushton nga wala niya matubag og tarong ang gipangutana kaniya atol sa coronation night sa maong indigay. Bisan pa man sa maong panghitabo, wala magmahay si Vickie nga misalmot siya sa Bb. Pilipinas. Wala sab siya maalkansi gumikan kay nanghakot sab siya og  minor awards.

Nanganak sa balay

Gibutyag ni Rica Peralejo nga 25 ka oras siya nga nagbati sa iyang ikaduhang anak. Dugang pa ni Rica nga sa balay lamang niya  kini gihimugso.  Mapasalamaton si Rica gumikan kay himsog gyud ang  bata nga gihulagway niya nga blessing sa iyang kinabuhi.

Nangandam sa kasal

Nangandam na karon sila si Sarah Lahbati ug Richard Gutierrez alang sa ilang kasal nga mahitabo  sunod tuig. Wala pa gibutyag ni Sarah kun unsa ang tukmang petsa niini. Kahinumdoman nga gianunsyo sa duha nga engaged na sila niadtong 2017.

Naghuwat og timing

Daghan ang nakapangutana kun aduna ba’y plano nga mosalmot ang  aktres nga si Michelle Dee sa mga dinagkoay nga mga beauty pageant puhon. Mitubag si Michelle nga anak ni Melanie Marquez nga naghuwat lang siya sa maayo nga timing alang kaniya ug  nipasalig kini nga  pangandaman ang maong butang aron nga dili siya mapakyas.

Consultant

Isip anak sa usa ka matinee idol niadtong 80s ug anak sa usa ka theatre actress, giisip sa ‘Los Bastardos’ star nga si Joshua Colet nga ang iyang ginikanan mao ang iyang tigiya sa  iyang trabaho isip usa ka aktor. “Kapag may mga kailangan ako, kung may katanungan ako, sila yung una kong tinatanong kung ano maganda gawin dito o ganyan. Tapos nagbe-brain storm kami kung ano magandang sa karakter ko for example. Pag napapanuod nila [ako] sa teleserye tinatanong ko sila kung okay ba yung ginawa ko”, esplikar pa ni Joshua.

Mobalik sa teleserye

Dili  pa kumpirmado apan nihatag na og pasiuna nga impormasyon ang  direktor nga si Jojo Saguin kalabot sa pagbalik  nila  ni Nadine Lustre ug James Reid sa telebisyon. Ulahi nga nakita ang duha niadtong 2017 sa serye nga “Till I Met You”. Matud pa ni Direk Jojo nga gituman nila ang request sa usa ka fan nga hatagan og  laing serye ang JaDine  tungod kay makakilig gyud ang ilang tandem.