Movie ni Sarah plantsado na
CEBU, Philippines – Usa ka pelikula ang kabisihan na usab sa singer-actress nga si Sarah Geronimo ug duna kini working title nga “Unforgettable” nga ubos sa direksyon ni Jun Robles Lana.
Makauban ni Sarah sa maong pelikula sila si Gina Pareño, Ara Mina, Yayo Aguila, Meg Imperial ug Kim Molina.
Gihimo na niadtong Miyerkules ang look test ug story conference sa buhatan sa Viva Films . Katapusang pelikula ni Sarah mao ang Miss Granny niadtong August 2018.
Jameson ug Iza magpares
Human ni-click kaniadto ang tandem nila ni Toni Labrusca ug Angel Aquino sa Glorious, lahi napud nga digital series sa iWant nga magtuki og May-December affair ug kini pagabidahan nila ni Jameson Blake ug Iza Calzado. Gihimo na sa miaging adlaw ang look test ug sensuality workshop alang sa duha.
Ang maong proyekto nag-ulohan og 400 Miles ug gipaabot ang mga init nga eksena nila ni Jameson ug Iza sa maong proyekto.
Naputos sa mga pagdayeg
Giingong nadugangan ang tagsa-tagsa nga international projects nila ni Morissette Amon ug Darren Espanto.
Bag-ohay lang nag-kolaborasyon ang duha sa awit nga “ A Whole New World” dinhi sa Pilipinas.
Nakadawat ang duha og mga daghang pagdayeg gumikan sa hugyaw nila nga rendisyon sa maong awit.
Ang maong awit maoy theme song sa Disney film nga Aladdin.
Nanghatag og mga wig
Nakatatak na gyud sa suking viewers sa Kadenang Ginto ang wig ni Dimples Romina .
Tungod niini, nanghatag siya og wig ngadto sa fans sa maong teleserye.
Wala damha ni Dimples nga ubay-ubay ang mokagat sa iyang pakulo busa plano niya nga manghatag og dugang wig alang sa ikaduhang batch.
Patagmon ni Jessa
Gibutyag ni Jessa Zaragoza nga gihimoan gyud niya og legal nga aksyon ang netizen nga nanghulga sa iyang anak nga si Jayda.
“May hangganan naman ang pagpapasensya e. Sumobra na. Hindi pwedeng joke joke lang yun ‘di ba? Kailangan maging responsable ka sa mga salitang lumalabas sa bibig mo,” suma pa ni Jessa.
Isip usa ka inahan, kinahanglan niya nga panalipdan ang iyang anak.
Nagpungasi ang projects
Lahi-lahi nga hugna sa paghigugma ang mensahe sa umaabot niya nga mga kanta nga i-release niya puhon.
Kahinumdoman nga nipirma og kontrata si JM sa Star Music.
Gawas sa pagkanta, aduna pud siya’y umaabot nga teleserye ug pelikula.
Gikalagotan tungod sa role
Giangkon ni Sophie Albert nga nakadawat siya og daghang “hate messages” gumikan sa iyang kabit role sa teleseryeng Bihag. Mga mahait nga pulong ang iyang nadawat apan igo ra siya nipahiyom ug nagpakita lang kini nga epektibo ang iyang role sa maong teleserye
Engaged na
Niulbo ang report nga matud pa engaged na sila si Cavite Vice Governor Jolo Revilla ug girlfriend niya nga si Angelica Alita. Giingong nabatyagan sa kadaghanan ang diamond ring nga gisul-ob ni Angelica sa dihang nibakasyon sila sa Boracay.
Kausaban sa kinabuhi
Dako gyud og kausaban sa kinabuhi ni Christian Bautista sukad sila nagminyo ni Kat Ramnani. Nindot matud pa kaayo ang feeling nga excited siya mouli sa balay gumikan kay nagpaabt kaniya ang iyang asawa. Wala pa’y plano ang duha nga makabaton og anak.
Nagtapok ang mga lig-on
Dakong garbo alang kang Jeric Gonzales nga makauban ang mga lig-ong artista sa umaabot nga teleserye sa GMA-7 nga Rosang Agimat nga gilangkoban nila ni Eddie Garcia, Celia Rodriguez, Luz Valdez ug Tonton Gutierrez.
Kaanyag milutaw
Gitug-an ni Erich Gonzales ang iyang sekreto sa pagmintinar sa iyang kaanyag. Pinaagi sa iyang vlog, gibutyag sa aktres nga kanunay gyud siya mogahin og oras sa gym. Motungas usab siya usahay sa bukid.
Mobalik sa Japan
Dili gyud makalimtan ni Gerald Anderson ang iyang mga kasinatian sa pagtikang niya sa Japan. Nitikang ang aktor sa maong nasud kauban si Julia Barretto alang sa shooting sa pelikulang Between Maybes. Suma pa ni Gerald nga limpiyo ug nahimout gyud siya sa kultura sa maong dapit. Plano ni Gerald nga mobalik puhon sa Japan.
Lahi nga proyekto
Giklaro ni Heart Evangelista nga dili ‘China Rich Girlfriend’ ang international film nga gigama niya karon. Lahi nga action movie ang gikabisihan karon ni Heart ug kasamtangan kini nga gi-shoot didto sa China.
Mao diay
Nagpa-release diay sa iyang kontrata isip One Up member sa GMA- Artist Center si Ralf King gumikan sa iyang pangandoy nga mobalhin sa ABS-CBN. Ni-audition kini sa Idol Philippines ug nigamit kini sa screen name nga Kier King.
Kelly ug Tom nagbuwag
Nagbuwag na ang Kapuso actress nga si Kelly Day ug ang Kapamilya model-actor nga si Tommy Esguerra. Suma pa sa duha nga mo-focus lang una sila sa tagsa-tagsa nila nga kinabuhi. Nilungtad og duha ka tuig ang ilang relasyon.
Andam na maka-anak
Andam na ang magtiayong Pancho Magno ug Max Collins nga makabaton og anak ilabi na karon nga nakapatukod na sila og kaugalingong balay. Malipayon kaayo ang duha sa ilang kinabuhi isip magtiayon..
- Latest