Naka-duet ni Vina
CEBU, Philippines — Dili basta-basta ang special guest sa show ni Vina Morales didto sa Amerika ug usa gyud kini ka produkto sa American Idol nga si Thomas Stringfellow.
Nahitabo ang maong show sa miaging gabii didto sa Michael D. Rose Theater /University of Memphis.
Samtang sa iyang Instagram account, gipaambit ni Vina ang iyang cover video kun diin ka-duet niya si Thomas.
Gikanta nila ang “Shallow” nga gipasikat nila ni Lady Gaga ug Bradley Cooper.
Mikuwestyon sa iyang lawas
Dili komportable si Sanya Lopez kun dunay modayeg sa pamorma sa iyang lawas.
Nasayran nga nakadawat og daghang sugyot si Sanya nga sudlon na ang pagpa-sexy apan wala gyud siya mosanong.
“You know what, ayoko rin po kasing i-consider ‘yung sarili ko as a ‘sexy actress,’ kasi parang hindi naman ako ganu’n ka-sexy,” suma pa niya.
Matud pa ni Sanya lahi ra gyud ang sexy ug wala gyud siya kakita niini sa iyang kaugalingon.
Aicelle gipadala sa China
Ang Kapuso singer nga si Aicelle Santos maoy representante sa Pilipinas sa Asian Culture Carnival nga gihimo didto sa Beijing, China sa miaging gabii.
Gikanta ni Aicelle ang ‘Nais Ko’ ug nahimuot pag-ayo ang audience sa iyang performance.
Miabot ngadto sa 30,000 participants ang nisalmot sa maong kalihokan nga nagtangag sa tema nga “Celebration of Youth, Dream of Asia.”
Mahalon nga regalo
Nahugyaw si Kim Chiu kang Kris Aquino gumikan kay giregalohan siya niini og pink nga Chanel handbag.
“OMG! Thank you so much, ate! This is too much but thank you sobra,” suma pa sa IG post ni Kim.
Nasayran nga mahal kaayo ang maong item.
Una na gibutyag ni Kim nga naa ra gyud siya kanunay kun manginahanglan og kaistorya si Kris.
Palagot sa Kontra?
Nabatyagan sa netizens nga susama og pattern ang mga post sa pipila sa miyembro sa Ex Battalion human gianunsiyo ni Ai-Ai delas Alas nga nibiya na kini isip manager sa maong grupo.
Kasagaran kanila ang nagpasalamat base sa Facebook posts sa Ex Battalion members nga sila si Mark “Bosx1ne” Maglasang, Rhenn “Hak Man Do” Mangabang, Daryl “Skusta Clee” Borja Ruiz, James Brando, ug Archie “Flow G” .
Wala na gidetalye sa maong grupo kun unsa ang gipatigbabaw nila nga punto kalabot sa ilang mga post.
Kahinumdoman nga wala na mahimuot si Ai Ai sa batasan sa mga miyembro sa Ex Battalion hinungdan nga nibiya na kini sa paghupot niini.
Naglawig sa ere
Kanunay gyud nga trending sa social media ang teleseryeng “Kadenang Ginto” sa ABS-CBN . Partikular na nga pistahan sa netizens ang panagsumpaki sa mga role nila ni Dimples Romana ug Beauty Gonzales.
Nasayran nga makadaghan na nga gi-extend ang maong teleserye.
Gawas nila ni Dimples ug Beauty , nalakip pud sa maong serye sila si Andrea Brillantes ug Francine Diaz.
- Latest