Angel Locsin ni-walkout sa taping?

CEBU, Philippines – Nikisaw karon ang taho nga matud pa ni -walkout si  Angel Locsin sa taping sa   teleseryeng The General’s Daughter  sa  miaging adlaw. Lahi-lahi ang nanggawas nga  istorya,  dunay tsika nga wala kaagwanta si  Angel sa mga kasaba sa direktor nga si Direk Manny Palo.

Apan duna puy laing report nga nitumaw nga matud pa nga dunay gipadangat nga concern si Angel sa usa niya ka eksena apan gitalikdan lang siya sa tawo nga iyang gikaistorya.

Sa pagsuwat niining balitaa, wala pa mohatag og tubag ang  mga tagdumala sa maong serye kalabot sa niulbo nga  taho.  

Kelsey molugwa sa Sports Illustrated

Nilugwa  ang  Pinay nga  Victoria’s Secret model nga si Kelsey Merritt sa sikat kaayo nga magazine sa Amerika nga   Sports Illustrated .

Gi-post ni Kelsey sa iyang Instagram account ang pipila sa kuha sa swimsuit edition shoot sa Sports Illustrated  ug gipistahan kini og maayo sa iyang followers.

Gikatahong sa Mayo molugwa si  Kelsey sa maong magazine.

“I’ve been keeping this a secret for a while, and now I’m so excited I get to finally share with you all that I’m the newest Sports Illustrated Swimsuit 2019 Rookie!!! ,” suma pa sa iyang IG post.

Coleen mipasilong sa Viva

Nipirma na og kontrata si Coleen Garcia sa  Viva Artist Agency niadtong Lunes.   Una na nga nitikang sa Viva ang iyang bana nga si  Billy Crawford.  Wala hinuon gidetalye ni Coleen kun duna pa ba siya’y follow-up project sa ABS-CBN. Giingong nilungtad og pito ka tuig si Coleen sa Star Magic.

Hiram na Anak

Sila si Yasmine Kurdi  ug Paolo Contis ang magpares sa upcoming drama  series sa GMA-7 nga   Hiram na Anak.  Pang-buntag matud pa ang timeslot sa maong serye . Nagpanikad na si Paolo niini sanglit masukod napud ang iyang abilidad sa drama.

Yeng ug Joem magpares

Sa labing unang higayon, mag-uban sa usa ka proyekto sila si   Yeng Constantino ug  Joem Bascon.   Magpares ang duha sa pelikulang Write About Love. Suma pa ni Joem nga nag-audition gyud  siya aron malakip sa maong proyekto.

Magpadayon  ang tandem

Human sa  TV show nga  Wansapanataym,  magpadayon ang tandem nila ni Heaven Peralejo ug  McCoy de Leon  pinaagi sa usa ka pelikula. Mag-uban ang duha sa upcoming movie sa Star Cinema nga The Mirror.

Pribado gihapon

Usa ka tuig na ang nilabay human gikasal si  Mike Tan sa iyang non-showbiz  nga hinigugma.  Dili gihapon ibutyag ni Mike ang identity sa iyang asawa gumikan kay gusto  niya nga pribado ang ilang kaminyoon.  Aduna na sila’y usa ka anak niini.  Hinay-hinay na si Mike sa pagasto sukad nakabaton og kaugalingong pamilya.

Pasok sa banga

Malipayon si Marco Gallo gumikan kay  nalakip siya sa pelikulang  Familia Blondina. Usa siya sa mga anak  ni  Karla Estrada.Nasayran nga comedy movie ang maong proyekto.

Misikat og samot

Nagkasaka ang popularidad sa singer nga si  Katrina Velarde. Nisamot pa gyud sa dihang nilugwa siya sa programang Gandang Gabi Vice niadtong Domingo.  Giingong sikat si Katrina sa laing nasud.

Alang sa gf

Nag-compose  og daghang kanta si Tom Rodriguez ug iyaha kining gipahinungod  ngadto sa iyang girlfriend nga si  Carla Abellana.  Ang pagsuwat og kanta maoy usa sa hilig ni Tom kun wala siya buhaton. Nibakasyon ang duha dili pa lang dugay didto sa laing nasud.

Molugwa sa  American show

Nilarga ang  TNT Boys paingon sa Los Angeles, USA niadtong Lunes.  Molugwa ang maong grupo sa  American talk show ni James Corden  nga  The Late Late Show. Ang TNT Boys gilangkoban nila ni Keifer Sanchez, Mackie Empuerto, ug Francis Concepcion.

Nagkita  sa igsuon

Nagmaya og maayo si  Liza Soberano gumikan kay nahimamat gyud niya ang iyang half-brother nga nibisita dinhi sa Pilipinas dili pa lang dugay.   Ang iyang  Portuguese-Filipino nga igsuon ginganlan og John.

Maymay isip Catriona sa MMK?

Niulbo karon ang tsika nga nipaubos na og todo workshop sa pagpaso   ang aktres nga si Maymay Entrata isip pagpangandam alang sa pagdala niya sa karakter ni Miss Universe 2018 Catriona Gray  sa usa ka episode sa Maalaala Mo Kaya. Gisumsoman og maayo sa netizens kagahapon ang maong taho.

Kahinumdoman nga nilenggua kaniadto si Catriona nga ganahan siya  nga si  Maymay  ang  modala sa iyang karakter kun mohatag og tsansa ang MMK nga mopagawas og episode nga naghisgot sa kaagi sa iyang kinabuhi. 

Daniel mopahuway sa trabaho

Gibutyag ni  Karla Estrada nga usa ka buwan nga pahuway sa trabaho ang gipangayo sa iyang anak nga si Daniel Padilla   ug nananghid kini sa mga kadagkoan sa ABS-CBN.

Todo bakasyon ang aktor kauban ang uyab niini nga si Kathryn Bernardo  ug plano usab kini nga molaag sa laing nasud kauban ang iyang igsuon.

Matud pa nga mo-relax og taman si Daniel  gumikan kay  duha ka mga pelikula ang nagpaabot kaniya.

Una na nga nitumaw nga dunay giatubang nga problema ang relasyon  nila ni Daniel ug Kathryn apan gihimakak kini ni Karla.

Huling El Bimbo banhawon sa RWM

Human nagmalampuson sa miaging tuig ,  ibalik sa entablado ang sikat kaayo nga musical play nga  “Ang Huling El Bimbo”   nga gipaluyohan sa Resorts World Manila.

Suma pa sa Chief Integrated Marketing Officer nga si Martin Paz nga dili basta-basta ang positibong feedback sa maong play  busa nakahukom ang  RWM nga ibalik kini sunod buwan sa Newport Performing Arts Theater.

“Maraming nanood , at sobrang nag-enjoy sila sa Huling El Bimbo ,”  suma pa ni Paz. Nasayran nga na-sold out gyud tanang pagpasundayag niini sa miaging tuig . Ang maong musical play nag-feature sa mga awit sa  iconic ‘90s Filipino rock band nga Eraserheads.

Matud pa ni Paz nga ubay-ubay gyud ang ni-request nga banhawon ang maong play  ilabi na kadtong nahutdan og ticket sa miaging tuig. Ang pagbalik sa Ang Huling El Bimbo maoy usa ka kalingawan  nga gidalit sa  Resorts World Manila isip pagsaulog sa  ilang 10th anniversary.

Magpabilin ang original stars niini nga naglangkob nila ni  Gian Magdangal, OJ Mariano, Jon Santos, Reb Atadero, Boo Gabunada, Bibo Reyes, Tanya Manalang, ug ang giila nga  First Lady sa Philippine Theater herself nga si  Menchu Lauchengco-Yulo.

Tungod kay nagkalapad naman ang maong play,  gidugangan  kini og  mga alternatibong  grupo nga naglangkob nila ni  - Nicco Manalo, Lance Reblando, David Ezram, Phi Palmos, Myke Salomon, Rafa Siguion-Reyna, Gabriella Pangilinan, ug  Carla Guevara- Laforteza.

“May mga  eksena na mas pinatindi  , at yan ang dapat abangan, “dugang pa ni Paz.

Mga lig-on matud pa ang naglangkob sa creative team niini  , kini sama nalang sa direktor nga si  Dexter Santos, Musical Director Myke Salomon, Associate Director Menchu Lauchengco-Yulo, Artistic Director Michael Williams, Playwright Dingdong Novenario, Costume Designer Marlon Rivera.  Gipuno usab sa grupo ang  writer-director nga si  Floy Quintos.

Naandan na gyud sa RWM ang paghatod og mga kalingawan sa katawhan ug mogama og mga espesyal nga presentasyon .

Matud pa nga aktibo kaayo ang  RWM sa pag-produce og mga musical play gumikan kay tumong nila nga ipakita ang pang-world class nga  abilidad sa mga Pinoy sa pag-arte sa entablado.

“Alam naman natin na hindi basta-basta ang mga talento ng Pinoy lalo na sa pag-arte ,” dugang pa niya.

Nagkanayon  si Paz nga duna pa’y gihan-ay nga mga kalingawan ang RWM   nga seguradong kagaton sa mga Pinoy.  Kahinumduman nga ang RWM  gihapon ang nag-produce kaniadto sa  Bituin Walang Ningning nga gibidahan sa Cebuana singer nga si Monica Cuenco.   Kini usab ang nag-produce sa  Annie: The Musical   ug  Chitty Chitty Bang Bang.