P20M Budget Aron Bangonon Ang Action Films

CEBU, Philippines — “Kailangan nating buhayin ang Imus Production kasi alam natin na konti na lang at bilang na bilang na lang ang gumagawa ng action films. Kailangan nating suportahan yung mga supporting, yung mga crew, mga stuntmen. Siguro kailangan nating buhayin. At siyempre para mapakita din ng Imus na we are still here.”

Ang maong mga rason maoy nagtukmod matud pa sa Imus Productions aron subling mugama og mga pelikula, ug maoy naghatag og dalan, aron mahimugso ang lilas nga “Tres” nga kasamtangan na nga gipasalida sa mga sinehan lukop nasud sukad pa niadtong Miyerkules. Kini maoy gibutyag ni Cavite vice governor Ramon “Jolo” Revilla III, kinsa dinhi sa Sugbo kagahapon alang sa special screening sa nahisgutang pelikula diha sa SM City Cebu.

Ang “Tres” nga ginama sa Imus Production ug giapod-apod sa Star Cinema, usa ka action trilogy nga nagsentro sa kampanya batok sa ginadili nga druga. Apan giklaro ni Jolo nga dili kini pinasubay sa tinuod nga istorya sa kinabuhi. Aduna matud pay mga eksena nga susama sa mga nanghitabo karon sa katilingban, ug kanang tanan niya pa produkto sa pagpanukidoki sa mga tagsuwat ug direktor.

Ang matag istorya nga naglangkob sa trilogy, gibituonan sa managsuong Bryan, Luigi, ug Jolo. Duha ang mga direktor niini nga sila si Dondon Santos ug Richard Somes. Ubay-ubay sab nga mga artista ang naglangkob niini sama nila ni Joey Marquez, Assunta de Rossi, Rhian Ramos, Dominic Roque, Vens Manalo, Lovie Poe ug Albert Martinez.

Giangkon ni Jolo nga dakong hagit matud pa nilang managsuon ang muhimo og action films labi na kay ilado kaayo sa natad sa action movies ang iyang lolo ug amahan, apan gihatag gyud matud pa nila ang tanan nga ilang makaya aron munindot ang nahisgutang pelikula.

“Isang malaking hamon. Kasi Ramon Revilla—Legend. Bong Revilla—Titanic Star. But we did our best,” nagkanayon pa si Jolo.

Nasayran nga ilado sa paggama og action films ingon man fantasy movies ang Imus Films kaniadto diin ang lolo ug amahan ni Jolo ang mga bida.

Gipasigarbo sab ni Jolo nga giyak-an gyud matud pa sa iyang amahan nga si Bong ang maong pelikula. Gitutukan matud pa sa kanhi senador ang tanang detalye niini, gikan sa scriptwriting, editing, lakip na ang casting. Nasayud matud pa siya nga lisud gyud kadtong tanan alang sa ilang amahan sanglit anaa kini sulod sa bilangguan diin wala itugot ang gadget.

Awhag ni Jolo nga tan-awon unta ang maong pelikula sanglit gihaguan ug gipanindotan gayud nila kini og maayo aron malingaw ang tumatan-aw. “Hindi lang ito puro action. It’s an eye opener for everyone with the current situation and events here in our country. And at the same time madami tayong mapupulot na aral dito, lalong lalo na para dun sa mga nalulong sa droga na gustong magbago na hindi pa huli ang lahat, na may pag-asa pa.”

Dugang pa usab ni Jolo nga realidad ang ilang gipakita dinhi niining maong pelikula diin nakig-alayon siya sa PNP ug PDEA aron masiguro nga husto ang ilang pagpakita sa mga eksena. Dili sab gyud matud pa kabintahaan ang action scenes dinhi niining maong pelikula ilabi na nga labihan na kadagko sa mga eksena nga gipakita sa “Ang Probinsyano” diin usab siya nalakip.

“So dito nagpasabog tayo ng barko. Nagpasabog tayo ng mga sasakyan. So panoorin nyo at kayo na ang humusga,” niya pa.

Tug-an pa ni Jolo sa Banat News Hugyaw nga mukabat ngadto sa P20M ang ilang puhunan sa maong pelikula, busa nagmatuod lamang kini unsa ka dako sa ilang tinguha nga makatabang aron subling musulbong ang action films sa nasud.

Mapasalamaton hinuon siya kay gihangop matud pa sa publiko-- ilabi na sa mga probinsya-- ang nahisgutang pelikula. Gani niya pa mas kusog matud pa ang “Tres” itandi sa kadungan niining mga pelikula sa mga sinehan.

Samtang kabahin sa balita nga wala matud pa makaabot og P1M ang first day gross sa Tres, si Jolo miklaro nga ang maong kita naggikan lamang sa NCR theaters. Tug-an niya sa Banat News Hugyaw, P3M ang kita sa maong action movie sa unang adlaw sa pagsalida niini sa mga sinehan lukop nasud….