Vhong ayaw pag-usapan ang pagpapakasal

Ang saya-saya ni Mother Lily Monteverde sa Thanksgiving Party ng Unli Life at Signal Rock noong Martes sa Valencia Events Place dahil box office hit ang comedy movie na pinagbibidahan ni Vhong Navarro at nag-win ng Critics Choice award sa 2nd Pista ng Pelikulang Pilipino ang pelikula ni Chito Roño.

Natawa si Vhong sa dialogue ni Mother na pinayaman niya ang Regal dahil kumita nga sa takilya ang Unli Life.

Dinedma pero napa-smile si Vhong nang banggitin ko ang balita na nasagap ko tungkol sa kanyang nalalapit na pagpapakasal na parang ayaw muna niyang pag-usa­pan.

Malaki talaga ang possibility na masundan pa ang mga movie project ni Vhong sa Regal dahil bongga ang partnership nila ni Mother.

Tuwang-tuwa si Chito Roño dahil sa mga bonggang reviews at positive feedback sa Signal Rock na balak niyang ipalabas sa Biri, Samar dahil ito ang request ng village people.

Feeling proud si Chito dahil napasaya niya ang mga resident ng Biri na malaki ang participation sa Signal Rock.

Hindi nahirapan si Chito na maghanap ng mga bitplayer sa mga crowd scene dahil ang mga taga-Biri ang nag-volunteer bilang mga extra. Si­yempre, binigyan sila ni Chito ng honorarium para sa kanilang special participation sa Signal Rock.

Kinumpirma ni Chito na isasali nito ang kanyang critically-acclaimed movie sa mga international film festival pero sisiguraduhin niya na hindi magiging biktima ng censorship ang mga maseselan na eksena.

Hindi lang ang Unli Life at ang Signal Rock ang pinag-uusapan sa Thanksgiving Party na ipinatawag ng Regal dahil topic din ng press people ang Miss Granny, ang drama comedy movie ng Viva Films na nagbukas kahapon sa mga sinehan.

Si Sarah Geronimo ang star ng Miss Granny at kung maririnig niya ang mga papuri ng press sa acting niya sa pelikula, tiyak na magiging maligayang-maligaya siya.

Wala akong narinig na pinintasan ang Pinoy version ng Miss Granny kaya naniniwala ako na totoo ang sinabi ni Ryan Bang na mas maganda ang pelikula ni Sarah kesa sa original Korean version.

Nalaman ko sa Thanksgiving Party ng Regal na marami nang adaptation ang Korean version ng Miss Granny, meron nang Vietnamese, Chinese, Japanese, Indonesian at Thai.

Ang sabi ng fans, napapanood na ang iba’t ibang version ng Miss Granny sa Youtube pero ang Chinese adaptation lang ang may English subtitles.

Panonoorin ko sa Youtube ang Korean version ng Miss Granny para may comparison ako kapag pinanood ko ang talk of the town na Pinoy adaptation na pinagbibidahan ni Sarah. Intrigang-intriga talaga ako habang pinakikinggan ko ang kuwentuhan ng mga reporter tungkol sa Miss Granny, lalo na ang mga eksena na nagsasalita si Sarah ng words na hindi mo iisipin na lalabas mula sa kanyang bibig.

Hindi nagpakabog si Mother Lily sa kuwentuhan na puwedeng mapanood sa Youtube ang Chinese version ng Miss Granny.

Buong ningning na sinabi ni Mother na mapapanood din sa Youtube ang dance number niya sa kanyang 80th birthday sa Crowne Plaza Manila Galleria noong August 19.

Ipinagmalaki ni Mother na hindi ito nag-rehearse para sa dance number niya na tumagal ng dalawampung minuto pero hindi siya hiningal at hindi nakitaan ng pagkapagod kaya sa mga type na mapanood ang kanyang pagsasayaw, i-search n’yo na lang sa Youtube.