Ang “Pinay Beauty”

CEBU, Philippines — Paghatag og importansya sa kaanyag sa mga Pinay, pagkakontento sa kaugalingon ilabi na sa pisikal nga aspeto, ingon man usab paghatag og igong panahon ngadto sa mga tawo nga imong gihigugma.

Mao kini ang mga mensahe nga gipatigbabaw sa drama comedy film nga Pinay Beauty nga gibidahan nila ni Chai Fonacier, Bb. Pilipinas Universe 2016 Maxine Medina, Hannah Ledesma ug Edgar Allan Guzman.” Ubos kini sa Quantum Films.

Suma pa sa upat ka mga bida nga daghan gyud ang maka-relate sa maong pelikula.

Nitikang sila dinhi sa Sugbo niadtong Domingo alang sa promosyon sa ilang pelikula ug mainiton sila nga gihangop sa mga Sugbuanon.

Ipasalida na sugod karong adlawa sa mga sinehan ang Pinay Beauty isip kabahin sa  Pista Ng Pelikulang Pilipino.

Chai

Matud pa ni Chai nga bisan kinsa nag-agi og mga kalisdanan sa kinabuhi apan hinay-hinay nga masulbad sa pagligid sa panahon.

Dili basta-basta ang preparasyon ni Chai sa maong pelikula sanglit nidala siya isip performer sa usa ka amusement park partikular na sa karakter nga Snow White.

“Sige jud ko tan-aw og pipila ka kagabii  sa mga bideo sa  Disney princess, aron ako gyud makuha ang dating sa akong role,” matud pa ni Chai sa dihang nahinabi sa mga sakop sa E-Group atol sa presscon nga gidumala ni  Ms. Josie S. Pereyra sa JSP Ads and Promotions niadtong Domingo.

Nasayran nga nagpungasi ang career ni Chai didto sa kaulohan, gani nalakip siya sa seryeng Halik sa ABS-CBN.

Normal matud pa nga makabaton siya og  “insecurities” sa kaugalingon apan naa ra gyud kini sa tawo kon unsaon niya kini pagdala.

“Ako itomon man gyud ko, basta proud ko kun unsa ko. Sa una seguro naa na sa atong mga pangandoy nga ganahan ta moputi, pero karon, maka-realize nga kontento rako kun unsay naa nako, “matud pa niya.

Hinuon iyang girespeto ang hukom sa mga tawo nga dunay ipausab sa ilang kaugalingon.

“Siyempre ilaha mana nga desisyon, ato gyud na i-respect,” suma pa niya.

Kahinumdoman nga aktibo si Chai sa mga film industry dinhi sa Sugbo ug nilapad ang iyang popularidad sukad siya nalakip sa “Patay Na Si Hesus” nga entry gihapon sa PPP sa miaging tuig.

“Excited ko sa mahimong reaksyon sa mga tawo inigkahuman og tan-aw sa mga tawo sa among pelikula. Manghinaot lang pud ko nga mokita siya ,”  saysay pa niya.

Maxine

Samtang si Maxine sa iyang bahin, dakong garbo alang kaniya nga nalakip sa “Pinay Beauty” gumikan  kay napamatud-an gyud niya nga duna gyud siya’y talento sa pag-arte. Gidala niya sa maong pelikula  ang karakter sa usa ka artista.

“Dumaan naman ako sa mga workshop.  Dahil dito, mas lalong lumakas ang kumpyansa sa sarili ko. Marami akong natutunan dito,” matud pa niya.

Usa sa nakat-onan ni Maxine nga kinahanglan makahibalo ka muhangop sa imong kaugalingon  ingon man usab ang paghatag og gibug-aton sa  suporta sa mga tawo .

“Yung suporta ng mga tao sa paligid natin, bigyan natin sila ng halaga,” hirit pa niya.

Naanad na siya sa mga pagsaway nga iyang nadawat kaniadto, ilabi na sa panahon nga nisalmot siya og mga indigay apan wala gyud kini katumpag kaniya.

“Hindi ko masyadong pinansin ang mga negative na bagay.  Bahala na sila, basta ginawa ko ang mga bagay na ikakasaya ko, okay na yun. Hindi ako dapat magpapadala sa kanila,” dugang pa ni Maxine.

Matud pa sa beauty queen nga dili ra gyud magmahay ang mga tawo nga motan-aw sa ilang pelikula.

“Sobrang galing ni Chai dito, makikita ninyo na love talaga niya ang mga ginagawa niya,” suma pa niya.

Hannah

Samtang  si Hannah nga nisalmot sa Bb. Pilipinas pageant niadtong 2014, nipadayag  nga ang presensiya sa mga higala ug pamilya maoy makatabang aron mahuwasan sa  gibating insecurities. Lakinhon ang karakter  ni Hannah sa Pinay Beauty .

 “Bale sila yung support system natin, basta ang kailangan lang, i-appreciate mo kung  ano ka,”  matud pa niya. Nailhan si Hannah sa aktibong pagsalmot og mga indigay sama sa Bb. Pilipinas niadtong 2014.

Dili na bag-o kaniya ang pag-arte, gani nakalugwa na siya kaniadto sa pipila ka mga episode sa Wansapanataym, Maalaala Mo Kaya ug Ipaglaban Mo.

Nakalugwa na usab siya pelikulang All of You, Can’t Help Falling in Love ug Ang Babae sa Septic Tank 2.

Edgar

Samtang si Edgar, nidala sa karakter  sa usa ka lalaki nga naningkamot gyud alang sa tawo nga iyang gihigugma.

“Natutunan ko talaga dito na sa pagmamahal, kailangan mo ding magtira sa sarili mo,” suma pa sa aktor.

Matud pa niya nga sa paghigugma dili usab malikayan  nga dunay maagian nga kasakit sanglit nagdepende kini kun giunsa kini pagdala sa duha ka habig.

Nahimong suki si Edgar sa mga bisan unsa nga mga film festival, ug aminado siya nga dako gyud kini og natabang sa pagpalapad pa og maayo  sa iyang talento.

“Sobrang happy, kasi nakita nila yung kakayahan ko,  sa kahit anong proyekto, sineseguro ko naman na ipapakita ko ang ibang atake sa pag-arte para hindi naman maging katulad sa previous projects ko,” matud pa niya.

Kahinumdoman nga nahinabi sa Banat News Hugyaw si Edgar didto sa Baguio City  niadtong 2012 alang sa serye niya kaniadto sa TV5 nga Never Say Goodbye.

Una niya nga gilenggua nga usa sa iyang sekreto aron magdugay sa industriya mao ang paghatag gyud og hustisya sa matag role nga ihatag kaniya.