Bamboo manghugyaw sa Cebu

CEBU, Philippines – Samtang nagsingabot ang kasaulogan sa  Independence Day sa nasud, mobisita ug mohatag og kalingawan ang The Voice Coach nga si Bamboo karong Hunyo 9, 2018  diha sa SRP Sugbo Grounds .

Usa kini ka dakong konsyerto  nga nag-ulohan og  Bamboo Live in Cebu (The Independence Day Concert).

Live nga madungog ug makita sa mga Sugbuanon ang  usa sa mga nabantog ug nag-unang singer sa  nasud kinsa mao ang nipasikat sa pipila ka rock songs sama sa “Tatsulok”, “Noypi” ug “Hallelujah”.

Magsugod ang maong konsyerto sa alas 7 sa gabii  ug gipaabot ang pagbaha sa mga Sugbuanon nga fans ni Bamboo.

Gawas sa performance ni Bamboo, angayan nga atangan ang panagtapok sa mga ilado nga local talents sa Cebu nga mao sila si Sarah Lopez, Marvin Yap, Amazing Peanut, Tombi, Shiela ug Sheina Mananquil (Power Twins), Indephums, Emping, The Agadiers ug The Power Trio.

Ang maong konsyerto gipasiugdahan kini sa Mousai Productions and Event ug inabagan kini sa M Talents Events and Promotions ni Aida Patana.

Mapalit ang mga ticket sa kantidad nga  P1,500  (VIP) ug P700 (General Admission).

Alang sa mga interesado mopalit sa tickets, mahimo nga mobisita sa mga ticket outlet nga anaa nahimutang sa The Park Social sa IT  Park, South Town Centre sa Talisay, Star Mall, Concierge sa Ayala Cebu ug J Centre Mall sa Mandaue. Mahimo sab nga mokontak pinaagi sa pagpadangat og mensahe sa 09162718096 ug 09171046222.

Matud pa sa Event Manager sa Mousai Productions nga si Kim Bautista nga dili gyud kamahayan ang pagsaksi sa  maong dako nga konsyerto nga mahitabo sunod buwan tungod kay masaligon siya nga dili gyud pakyason ni Bamboo nga  mohatag og tumang kalingawan sa mga Sugbuanon.