AlDub sa Bubble Gang

CEBU, Philippines - Molugwa sila si Alden Richards ug Maine Mendoza sa anniversary special sa Bubble Gang.  Komportable ra si Maine niini gumikan kay natural na man ang iyang pagka-komedyante.

Todo daginot

Bisan nagbaha ang kuwarta ni Alden Richards,  magdaginot  gihapon siya aron maseguro ang  iyang kaugmaon.  Tulin usab ang dagan sa iyang mga negosyo ug usa na niini mao ang iyang restraurant nga nahimutang sa Tagaytay City. 

Pakilig effect

Misamot kabilib si Jessy Mendiola sa  gidungog  niya nga boyfriend nga si Luis Manzano gumikan kay kanunay gyud siya panalipdan niini sa mga tawong nagsige og panaway kaniya. Dali ra usab matandog si Jessy sa ka-sweet ni Luis.     “I’m very happy na he’s like that. Siyempre kahit sino namang babae ay matutuwa kapag ganoon ang isang lalaki,” matud pa sa aktres.

Magtigi ang mga lig-on

Ang pelikula ni Vic Sotto nga Enteng Kabisote 10 maoy makaatbang sa pelikula nila ni Vice Ganda ug Coco Martin nga Super Parental Guardians nga ipasalida usab karong November 30. Nalipay hinuon ang moviegoers gumikan kay puros makalingaw nga pelikula ang ilang pilianan.

Dugay nahuman

Giingong dul-an sa 10 ka tuig ang pagama sa pelikula ni Rhian Ramos nga Saving Sally nga usa  sa nasulod sa Top  8 sa Metro Manila Film Festival.  Nalangan ang paghuman sa maong  pelikula gumikan kay nigahin og dakong oras ang pagpangita og producer niini.

Sayop ang termino

Wala kauyon si  Richard Yap sa rason sa Selection Committee sa  Metro Manila Film Festival nga gibase nila ang kalidad sa pelikula sa pagpili nila og entries sa maong film festival. Si Richard maoy  usa sa mga bitoon sa Mano Po 7: Chinoy nga wala madala sa Magic 8. Matud pa ni Richard nga dili mao ang gigamit nga pulong  sa kadagkoan sa MMFF.

Bana ni Chesca nasakit

Na-mild stroke ang bana ni  Chesca Garcia nga si Doug Kramer.   Giingong aduna’y sakit sa kasingkasing ang  nahisgutan nga basketball player. Gitambagan kini sa doktor nga mopahuway og pipila ka buwan sa dili pa kini mobalik sa pagduwa og basket.

Makaduaw ra

Gibutyag ni  Patrick  Garcia nga maayo ang pagtinagdanay nila sa iyang kanhi hinigugma nga si Jennylyn Mercado. Makaduaw  ra usab siya sa anak nila nga si Jazz. “Wala naman kaming problema,” suma pa ni Patrick.

Tatak Pinoy

Nagplano ang sikat nga Filipino-American director  nga si Anthnoy Diaz nga mogama og proyekto dinhi sa Pilipinas.  Si Anthony maoy direktor sa  Japanese inspired movie nga Break nga isalmot sa umaabot nga  2017 Sundance Film Festival.

Lig-ong programa

Nominado ang GMA documentary program nga Reel Time alang sa Best Social Awareness Program sa 21st Asian TV Awards. Nasayran nga ang maong show usab ang grand  winner  sa Asia-Pacific Child Rights Awards sa miaging buwan didto sa  Bali, Indonesia.

Mother Lily gipikhan ni Mercedes?

Niulbo ang taho nga matud pa gipadungog-dungog ni Mercedes Cabral ang tag-iya sa Regal Films nga si Mother Lily Monteverde kinsa nilenggua nga dili haom ang indie films panahon sa Pasko.

Nasayran nga wala madala ang pelikula sa Regal Films nga Mano Po 7: Chinoy sa Magic 8 sa Metro Manila Film Festival ug usa sa lenggua ni Mother Lily nga naluoy siya sa moviegoers ilabi na sa mga bata nga naanad na  nga motan-aw og family-oriented movies panahon sa MMFF.

Sa post  ni Mercedes sa Facebook, nigamit siya sa termino nga “idiot” nga   gidudahan  nga tubag kini sa mensahe ni Mother Lily.

“Nakaka-awa ang mga bata??? Sabihin mo lang e ang habol mo lang e kita ng pelikula mo. Saka bayaran mo ng maayos mga tao mo. Ni hindi ka nga makapagbayad ng matino sa mga taong nagtatrabaho sayo e. At kayo lang ba ang may karapatan magpalabas ng pelikula tuwing pasko? Fucking idiot,” suma pa ni Mercedes

Nalakip si Mercedes sa pelikulang “Oro”   nga usa sa mga entry sa MMFF karong tuiga. 

McLisse karong 2017

Gikatahong  magpares sa usa ka serye karong 2017 sila si McCoy de Leon ug  Elisse Joson nga puros produkto sa Pinoy Big Brother.

Kahinumdoman  nga nisidlak ang ilang  chemistry sa PBB   ug nakabaton usab sila og daghang followers ug gitawag ang ilang tandem og McLisse.

Ang Dreamscape  maoy gikatahong mogama sa proyekto nga pagaparesan nila ni McCoy ug Elisse.

Mariah nakadawat na

Giangkon sa international singer nga  si  Mariah Carey nga hinay-hinay na siya nga naka-move on sa  breakup nila sa  Australian billionaire nga  si James Packer.

Sa usa ka interview, gibutyag sa singer nga angayan na niya nga dawaton nga dili gyud para sa iyaha  si James.

Aron dili siya maguol sa  paghunahuna sa maong butang, mo-focus siya  sa iyang singing career karong panahona.

Aduna siya’y umaabot nga kanta ug ang tipik sa unod niini mao ang istorya sa napakyas niya nga lovelife.

Kadaghan na nga higayon nga gisuwayan ni Mariah nga maluwas ang relasyon nila ni James apan wala kini mosaler. (BANAT NEWS)