Mihangop sa apo

CEBU, Philippines - Gihangop na gyud sa unang higayon sa pamilya Ejercito ang anak nilang Andi Eigenman ug Jake Ejercito nga si  Ellie. Nag-post og mga hulagway sa Instagram account si Jake diin nigakos si Baby Ellie ngadto sa mga apohan niining sila si Joseph Estrada ug Laarni Enriquez.

Natural ang pagmugna

Nahugyaw ang mga tawong nitambong sa premiere night  sa pelikulang The Escort gumikan sa init nga mga eksena nila ni  Derek Ramsay ug Lovi Poe . Matud pa ni Derek nga wala gyud giapiki ang  maong love scene ug  wala’y adjustment sa suga nga nahitabo. "It's the most enjoyable love scenes that I've got in my entire career,” matud pa sa  aktor.

Nag-uban sa Korea

Nag-uban pinaagi sa usa ka dinner silang Sandara Park ug Team Real James Reid ug Nadine Lustre samtang nagbakasyon didto sa South Korea. Ang Korean pop star ug Pinoy Boyband Superstar judge nag-post og mga hulagway uban nilang James, Nadine, ug mga higala samtang nagkaon sa usa ka restaurant.

Kim gipanalipdan

Gidepensahan ni Direk GB Sampedro si Kim Domingo nunot sa isyung aduna’y attitude problem ang GMA-7 actress. Si Kim mao’y leading lady ni Vhong Navarro sa Mang Kepweng Returns ubos sa direksyon ni Direk GB ug gitakdang isalmot sa Metro Manila Film Festival 2016.

Zsa Zsa mitubag

Gitubag sa singer/actress nga si Zsa Zsa Padilla ang usa ka netizen human siya giingnan nga dali ra kaayo siyang nakalimot sa nipanaw na nga partner niini nga si Dolphy. "It's not bad to move on in life," tipik sa post sa Instagram account sa Divine Diva.

Gary V apohan na

Nakabaton na gyud og labing unang apo si Mr. Pure Energy nga si Gary Valenciano human nanganak si Samantha Godinez-Valenciano kinsa asawa sa anak niya  nga si Paolo Valenciano. Nigawas sa sabakan ni Samantha si baby Nataleia "Leia" Martine kagahapon sa  1:21 sa kadlawon. Gikasal silang Paolo ug Samantha niadtong Pebrero 2013.

Wala’y kalagot

Gibutyag sa Miss Earth 2016 Katherine Espin nga wala siya’y kalagot ngadto sa bag-o lang ni-resign  nga Miss Earth Philippines nga si Imelda Schweighart kinsa mipasiatab nga retokada ang iyang lawas. Dugang pa ni Katherine nga girespeto gihapon niya si Imelda ug naghinaot nga padayon nga magmalig-on sa  giatubang nga isyu.

Molugwa pagbalik

Gitakdang molugwa na usab sa ikatulong higayon si John Philip “Balang” Bughaw sa “The Ellen DeGeneres Show”. Una na nga gipabilib ni  Balang ang TV host nga si Ellen pinaagi sa nifty dance moves niini sa dihang nibisita kini sa iyang programa kaniadto. Tua karon sa London si Balang  alang sa  iyang paglugwa sa  programang “Little Big Shots” , usa ka kiddie talent program nga gi-produce ni Ellen.

Kahibulongang hitabo

Giangkon sa teen star nga si Inigo Pascual nga dili siya motuo og mga ungo pero gipaambit niya ang kasinatian nga iyang gikahadlokan. Matud sa aktor nga nakakita na siya og doppelganger o usa ka wala mailhing binuhat  nga gisunod ang hitsura sa iyang iyaan  ug nakit-an nga nisulod sa lawak apan pagtan-aw niya sa sulod sa kwarto niini, kalit lang kini nga nawala.

Lig-ong contender

Nagpabiling defending champion sa  "Tawag ng Tanghalan" sa noontime show nga  "It's Showtime" ang blind balladeer sa Bacolod City nga si Carl Malone Montecido. Mao na kini ang ikatulong higayon sa pagdepensa sa iyang titulo isip defending champion human gipildi ang daily winner nga si Ken Mariscal sa miaging adlaw.

Vivian mipabuhagay

Gisaway sa beteranang aktres nga si Vivian Velez si kanhi presidente Fidel Ramos tungod sa mga birada niini batok ni Presidente Rodrigo Duterte. Pinaagi sa Facebook post ni Vivian, gibutyag sa aktres nga wala’y katungod si Ramos nga mandoan si Pres. Duterte bisan pa man nga gisuportahan niya kini sa niaging eleksyon. “The old man is a spent bullet, empty shell... just because he supported PRRD he thinks he can steer him around. A stupid move actually Mr. ExP, what a way to be remembered tsk tsk tsk,” sigun pa sa aktres.