36th Cebu Pop Bulawanon ang mga mensahe nagmadaugon

CEBU, Philippines – Mipatigbabaw gyud  ang kahudyaka sa  36th Cebu Popu-lar Music Festival  nga gipahigayon diha sa Cebu Coli-seum niadtong Biyernes sa gabii.

Nagmadaugon ang kanta nga “Ngano Kaha” nga entry sa inspirational category, sanglit mao kini nakalangkat sa grand prize ug naghimo usab nga best interpreter sa niawit niini.

Ang “Ngano Kaha” ginama ni Irene Abadiez Bacus, ug  arranger niini mao si  Russel Alegado.

Gibutyag ni Bacus dinhi sa Banat News Hugyaw (BNH) nga wala gyud siya nagdahom  ilabi na pagkadungog niya sa ubang mang-aawit nga grabe usab ka lig-on.    .

Dili na bag-o si Bacus  sa indigay sa pag-awit, apan una kining higayon nga siya maoy nag-compose og kanta.

“Permi lang ko interpreter sa una, apan last year, nakahuna-huna ko nga mosuway og himo og kanta, kana ganing maka-relate ko,” suma pa ni Bacus.

Ang “Ngano Kaha” naghisgot kini sa  kapaet sa kinabuhi apan wala gyud mo-surrender  gumikan kay kanunay gyud nga gibutang sa hunahuna sa tawo nga duna gyu’y kahayag nga maabot  kung duna’y pangaliya ngadto sa Ginoo.

“Usahay makapangutana ta kung nganong ingon niini ang nahitabo sa atong kinabuhi, pero maabot gyud ang panahon nga makabangon ta,” dugang pa ni Bacus.

Sa pagsalmot ni Bacus sa Cebu Pop, usa gyud sa gipangayo niya kang Sto. Niño mao nga ma-okay ang iyang gisabak nga karon naa na sa ikapito nga buwan.

“Two months pa lang  nagmabdos, grabe kaayo akong kaguol, kay wala’y heartbeat ang bata nga sulod sa akong tiyan. Sige lang gyud ko og ampo, pag-abot sa ikatulo nga buwan, na-okay na ang kondisyon sa bata maong dako gyud ang pasalamat nako kang Sto. Niño,” dugang pa ni Bacus.

Samtang ang napili nga best interpreter nga si  Minglanilla, nisaysay nga usa sa estilo niya sa pagkanta mao ang paghatag gyud og saktong emosyon ug mao kini ang iyang gituohan kung nganong naangkon niya ang kadaugan.

“Kihahanglan gyud nga makasabot ka sa imong gikanta, kay kung makasabot ka, makahatag man ka og saktong emosyon,” suma pa ni Minglanilla kinsa nahimong finalist kaniadto sa Sinulog Idol 2013.

Samtang ang matulun-anon nga “Manguros Na Lang Ta Daan” nga ginama ni Jade Castro  maoy champion alang sa environmental category, ug si Russel Alegado maoy arranger niini.

Si Castro ra pud maoy interpreter sa iyang ginama nga awit ug naukyab gyud ang kadaghanan gumikan sa hugyaw nga intro nga instrumental sanglit makakawat gayud kini dayon og atensyon.

Suma pa niya nga paet kaayo karon ang kahimtang  sa kalibutan gumikan kay nagka grabe na pud ang pag-abuso sa mga tawo sa ginama sa Ginoo ug usa kini sa mensahe sa awit nga  Manguros Na Lang Ta Daan.

“Kinahanglan gyud  atimanon intawn natu ang kalikupan,  nakabantay na ko og maayo nga kusog na kaayo ang baha kung dunay uwan kay nahurot naman ang mga kahoy . Seguro dili pa uwahi ang tanan, pinaagi lang sa pagtanom  og kahoy, anam-anam natu nga mabalik ang  kanindot sa atong  palibot,”  matud pa ni Castro.

Si Castro maoy champion usab sa Cebu Pop 2014 alang sa awit niya nga  Ayaw Ako’g Biya-i” ubos sa  Ballad/ Pop Category.

Napili usab nga grand champion alang sa Love Song category karong tuiga ang ginama ni Ralph Maligro nga “Awit Ning Gugma” nga naghisgot og long distance relationship. Si Ralph Joey Cabusas maoy arranger niini nga gihatagan og kinabuhi ni Philipp Mancol.

Si Maligro tua karon sa laing nasud nagtrabaho busa istorya sa tinuod nga kinabuhi ang unod sa maong awit.

Gipahinungod niya ang maog awit ngadto sa girlfriend niya nga nagtrabaho karon isip maestra nga si Jane Longroño.

“Wala siya kaanhi karon sa Cebu kay busy siya sa work didto sa UAE,  ang song gyud kay para tu sa manag-uyab nga lagyo kaayo sa usag-usa nga sama sa among sitwasyon. Hilig gyud na si Ralph mobuhat og song para nako. Bisan layo mi sa usag-usa, wala na mahimong babag sa kalig-on sa among relasyon, “ suma pa  ni Longroño.

Ang interpreter niini nga si Mancol mapasalamaton kaayo kang Castro sa pagsalig niini nga gihatag kaniya.

“Ako lang gyud gisabot og maayo ang kanta, para matarong gyud nako og perform,” matud pa ni Mancol kinsa finalist sa Sinulog Idol Season 2.

Samtang ang  amahan sa Cebu Popular Music Festival,  kanhi kongresista  sa unang distrito nga si Atty. Eduardo Gullas nipadayag nga dako kaayo og natabang sa pagpalambo sa industriya sa musika ang Cebu Pop ug nagpadayon gihapon kini hangtud karon sanglit halad na niya kini ngadto kang Sr. Sto. Niño matag tuig.

Special guest usab niadtong gabhiona ang Asia’s Queen of Songs nga si Pilita Corales kinsa nidalit  og daghang  kanta nga nakapalingaw og maayo sa audience, samotan na nga nikanta siya og Matud Nila ug Usahay kung diin gipamatud-an niya nga wala gyud siya makalimot og binisaya nga awit  bisan paman nga taud-taud na siya nga nagbase didto sa kaulohan.

Misaludo usab si Pilita kang Gullas gumikan kay nagpabiling lig-on ang paghupot niini sa Cebu Pop sulod na sa taas nga katuigan.

Si Pilita, maoy labing una nga special guest sa labing una nga Cebu Pop, busa dakong garbo alang kaniya nga makatikang og balik sa entablado alang sa maong kalihukan.

Gihatagan usab siya og special award ni Gullas  gumikan  sa  natampo niini sa music industry , nga nakahatag matud pa  og dakong dungog sa Sugbo  gumikan sa kasikat  na sa iyang mga kanta, dili lang dinhi sa Pilipinas kundili sa nagkadaiyang dapit sa kalibutan.

Si Pilita maoy nagpasikat sa  mga awit nga nga A Million Thanks To You, Ako Raw ay Makasalanan, Ampingan Mo ba Ang Dalaga ,Noon at Ngayon, Ang Diwa ng Pasko ,Ang Kawayan, Ang Pag-ibig, Ang Pipit, Sayaw sa Ilaw Sayo sa Kabuntagon ,Sinumpa Ko sa Diyos, Sumpang Walang Hanggan, Tama Na ,The Shadow of Your Smile ug uban pa.

Sila si Sam Costanilla ug Apple Abarquez maoy hosts sa Cebu Pop 2016 ug nakahatag usab sila og dugang kasadya gumikan sa ilang mga komedya.