Husband material

CEBU, Philippines – Naglain ang pamati ni Kaye Abad busa usa ka semana siya nga gipapahuway sa doktor. Mapasalamaton si Kaye sa iyang boyfriend nga si Paul Jake Castillo gumikan kay mao kini ang tigbantay kaniya busa nakaingon ang aktres nga pang-husband material gyud si Paul Jake.

Hukman karong buwana

Magsugod na karong March 16 ang seryeng  Bridges of Love, nga pagabidahan nila ni  Maja Salvador, Jericho Rosales ug Paulo Avelino. Nagpanikad na ang tulo sa mahimong resulta niini.

Bantay sa uyab

Pagkahuman sa seryeng Ang Lihim ni Anassandra, ang Sunday All Stars ra ang gikabisihan ni Rochelle Pangilinan busa makahatag siya og dakong oras sa pag-atiman sa iyang boyfriend nga si Arthur Solinap kinsa bag-ohay lang naoperahan sa tuhod.

Nangandoy og apo

Giingong ganahan na pud og apo ang amahan ni Angel Locsin. . Una na nga gipadayag ni Angel nga madugay pa kini gumikan kay busy pa sila sa iyang uyab nga si Luis Manzano ug kinahanglan nga mag-una gyud ang kasal sa dili pa sila makabaton og anak.

Proud si Daddy

Gipasigarbo pag-ayo ni Robin Padilla ang dakong  grado   sa iyang anak nga si  Ali nga nagtungha didto sa Australia. Una na nga gipadayag sa aktor nga unya ra niya pasudlon sa showbiz si Ali kung makahuman na kini sa pag-eskwela.

Dingdong gihulipan ni Lloydie

Wala na giapil ni Direk Erik Matti si Dingdong Dantes sa pelikulang Ponzi ug iyaha kining gihulipan ni John Lloyd Cruz. Wala’y ideya si Dingdong sa maong kalit nga kausaban.

Bag-ong Marimar

Mohulma og ikaduhang remake ang GMA-7 sa Mexican series nga Marimar nga unang gibidahan ni Marian Rivera sa Pinoy version niini. Padayong nangita ang GMA-7 sa aktres nga mahimong bida niini.

Magbaha ang bata

Gipadayag ni Bianca Gonzalez nga nangandoy ang iyang bana nga si JC Intal og pito ka mga anak. Suma pa ni Bianca nga nakugang siya niini, “Wow, paano ko gagawin yun?,” hirit pa sa TV host.

Nalingaw sa bata

Giangkon ni Melissa Ricks nga nalingaw siya og maayo sa iyang pagpangunay og atiman sa iyang anak nga si Kiera Kelly . Usa kini sa rason kung nganong dili niya matino kung kanus-a siya mobalik sa showbiz.

Bea mihimakak

Gihimakak ni Bea Binene ang report nga matud pa si Derrick Monasterio maoy rason sa breakup nila ni  Jake Vargas. Naulaw na hinuon si Bea kang Derrick gumikan kay nadamay kini sa isyu.

Erich ug Daniel giintriga

Nakugang si Erich Gonzales sa tsika nga nag-link sa iyang pangalan ngadto sa kauban niya sa seryeng  Two Wives nga si Daniel Matsunaga. Suma pa ni Erich nga loyal siya sa iyang non-showbiz boyfriend busa igo na lang siya mokatawa sa maong tsismis. “Siguro nabibigyan lang ng kulay,” suma pa ni Erich.

Init nga kompetisyon

Misamot ka init ang kompetisyon sa mga noontime show nga Eat Bulaga sa GMA-7 ug It’s Showtime sa ABS-CBN gumikan kay susama sila nga dunay advice segment. Aduna’y “Advice Ganda” ang It’s Showtime , samtang ang Eat Bulaga adunay Problem Solving kung diin ang mga mananambag niini naglangkob nila ni Wally Bayola, Jose Manalo, Paolo Ballesteros ug  Marian Rivera .

Luis ug Marian magpares

Si Luis Alandy maoy leading man sa Kapuso Primetime Queen Marian Rivera sa umaabot nga serye sa GMA-7 ug makauban nila si Glaiza de Castro. Gihimo kagahapon ang story conference sa maong proyekto ug kini nag-ulohan og The Richman’s Daughter nga maghisgot sa lovelife sa tomboy.

The Voice PH Jason Dy maoy nakadaug

Si Jason Dy sa Team Sarah  maoy grand winner sa The Voice of the Philippines Season 2. Samtang ang pambato sa Team Apl de Ap nga si Alisah Bonaobra maoy runner-up ni Jason.

Nakaangkon si Jason og  52.94% nga votes samtang si Alisah  nakalangkat og 47.06% nga  votes.

“Maraming, maraming salamat sa lahat ng bumoto sa akin, lahat ng nag-effort, lahat ng nangampanya, lahat ng naniniwala sa akin, kay Coach Sarah. Sobrang thank you sa paniniwala sa akin. Thank you talaga,” suma pa ni Jason.

Nakahilak ang coach ni Jason nga si Sarah Geronimo sa dihang nakadaug ang iyang manok sa maong programa.

Giawit ni Jason sa final round ang Angels Brought Me Here ug iya kining gipahinungod kang Sarah nga gihulagway niya nga anghel gumikan kay usa kini sa nahimong instrumento sa pagkab-ot sa iyang pangandoy.  

Banana Split gisaway ni Ate Gay

Gisaway sa komedyanteng si Ate Gay ang programang Banana Split gumikan kay nigamit ang maong programa sa iyang mash-up version sa awit nga Love On Top.

Suma pa ni Ate Gay nga naukay siya sa dihang gigamit kini sa maong programa sanglit iyaha man kini nga gidumtan kaniadto.

Kahinumduman nga niadtong 2012,  nahiubos siya sa Banana Split human wala gipagawas sa maong program ang guesting niya sa maong show kung diin nag-promote siya niadtong higayona sa iyang concert.

Giingnan pa siya sa Banana Split kaniadto nga”waley” ang iyang jokes busa wala kini gipagawas sa maong programa bisan pa man nga naghuwat siya og tulo ka oras alang sa taping niini.

“Minsan iisipin at tatandaan na meron kayong sinaktang bakla na kagaya ko. Pinag-antay nyo ako ng tatlong oras,  pinag-taping na di pinalabas dahil waley. Ipinagkait nyo sa akin ang makapag-promote ng MoaArena ko at sabihang waley. Ngayon mapapanuod ko na nagmamash-up na kayo at ang pinagpuyatan kong material ay ginamit nyo pa. Walang mabait sa taong galit,” suma pa sa Instagram post ni Ate Gay.