Mananaug sa Himig Handog

CEBU, Philippines – Ang awit nga ''Mahal Ko o Mahal Ako'' nga ginama ni Edwin Marollano maoy napili nga Best Song sa Himig Handog Pinoy Pop Love Songs 2014 nga nahitabo niadtong Domingo sa gabii sa Araneta Coliseum. Si KZ Tandingan maong naghatag og kinabuhi sa maong awit.

Nahimutang sa ikaduhang puwesto ang ''Halik Sa Hangin,'' nga hinimo ni David Dimaguila ug gi-interpret nila ni Biv De Vera, Ebe Dancel ug Abra. Ang “Mahal Kita Pero” nga ginama ni Melchora    Mabilog maoy napili nga 3rd Best Song ug gihatagan kini og kinabuhi ni  Janella Salvador. Samtang nahimutang sa ikaupat nga puwesto ang "Walang Basagan ng Trip" ni Eric de Leon ug gi-interpret nila ni  Jugs Jugueta ug Teddy Corpuz . Ang 5th Best Song mao ang "Hindi Wala" ni Nica del Rosario nga gikanta ni  Juris Fernandez.

Samtang napuno usab sa pag-abiba sa mga tawo ngadto kang Daniel Padilla kinsa niawit sa ginama ni Meljohn Magno nga "Simpleng Tulad Mo" nga maoy nakalangkat  sa MOR Listeners Choice Award. Nakadawat sa  Star Cinema Choice Award ang  "Halik Sa Hangin"ni David Dimaguila. Ang ginama sa  Sugbuanong composer nga si Jude Gitamondoc  maoy napili nga   Star Studio Readers Choice – ug kini nag-ulohan og  "If You Don't Want To Fall" nga gi-interpret ni  Jed Madela.

Coleen mihimakak sa sex video

Gihimakak ni Coleen Garcia ang report nga matud pa siya ang babaye sa sex video nga nikatap karon. Wala molantaw si Coleen sa maong video gumikan kay wala na siya’y panahon niini ug 100% siya nga sure nga dili siya ang maong babaye. Posibleng susama ra kini niya og panagway.

Gisugdan na

Nagsugod na sila si Angelica Panganiban ug JM de Guzman sa taping sa umaabot nila nga  romantic comedy indie film nga  "That Thing Called Tadhana" . Todo post si Angelica og mga hulagway nila ni JM sa Instagram.

Malipayon alang sa ex

Gipadayag ni Antoinette Taus nga malipayon siya alang sa iyang ex-boyfriend nga si Dingdong Dantes kinsa kaslunon kang Marian Rivera karong Disyembre.  “I’m really excited that they decided to take this next step in their relationship,”  suma pa ni Antoinette.

Jake miangkon sa sayop

Nangayo na og pasaylo si Jake Ejercito, ngadto sa iyang ex-girlfriend nga si Andi Eigenmann ug niangkon siya sa kasaypanan nga iyang nabuhat. Kahinumduman nga nikatap ang hulagway ni Jake nga dunay kahalok nga laing babaye sulod sa usa ka bar.  Nanghinaut si Jake nga mapasaylo siya ni Andi.

Puros gipangbalibaran

Gitanyagan si Richard Gutierrez og proyekto sa GMA-7 ug TV5 apan puros niya kini gipangbalibaran.  Giingong mubo ra ang exposure nga gitanyag kaniya busa wala siya modawat niini.

Bag-ong GutieRrez natawo

Nanganak na niadtong Domingo og himsog nga batang babaye ang girlfriend ni Elviz Gutierrez nga si Alexa Uichico. Malipayon ang mga kabanay nga Gutierrez gumikan kay napun-an na pud og bag-ong miyembro ang ilang pamilya.

John nag-agad ni Isabel

Tsika pa ni John Prats nga nag-agad ra siya kang Isabel Oli alang sa tukma nga petsa sa ilang kasal. Gipangandaman gyud sa duha ang maong espesyal nga okasyon sa ilang kinabuhi.

Ganahan makaanak

Gusto na si Sheena Halili nga makabaton og anak apan dili pa kini mahitabo gumikan kay wala pa siya’y hinigugma. Suma pa ni Sheena nga naa na siya sa saktong pangidaron.

Dennis nahugyaw ni Kris

Nakadayeg si Dennis Trillo sa kauban niya sa seryeng Hiram na Alaala nga si Kris Bernal gumikan kay dali ra kaayo kini makahilak. Suma pa ni Dennis nga susama og garipo ang mata ni Kris gumikan kay todo gyud ang paghilak niini sa pipila nila ka mga eksena sa maong serye.

Bench nag-sorry kang Coco

Nangayo og pasaylo ang tag-iya sa Bench nga si Ben Chan ngadto kang Coco Martin gumikan kay nadamay kini sa isyu nga ilang giatubang. Kahinumduman nga naputos sa mga pagsaway ang "The Naked Truth" gumikan sa segment kung diin giguyod ni Coco ang babaye nga gihiktan ang lawas. Una na nga nangayo og pasaylo ang Bench ngadto sa publiko sa miaging semana.

Nakatabang ang Be Careful

Mapasalamaton sila si Gloria Sevilla, Marissa Delgado ug Carlos Salazar sa seryeng Be Careful With My Heart sa ABS-CBN gumikan kay mao kini ang nakapabanhaw sa ilang career. Naghinapos na ang maong serye ug panghinaut nila nga mahatagan sila og follow-up project sa ABS-CBN.

Nagkadaghan ang pangalan

Gibutyag ni Marian Rivera nga samtang nagkaduol ang buwan sa Disyembre, nagkataas usab ang listahan sa mga pangalan sa mahimong ninang ug ninong sa umaabot nila nga kasal ni Dingdong Dantes. Suma pa ni Marian nga nagpasabot lang kini nga daghang espesyal nga mga tawo sa iyang kinabuhi.

Halinon

Malipayong gipahibalo ni Toni Gonzaga nga gamay na lang ang nahibilin nga mga ticket sa umaabot niya nga 15th anniversary concert sa Mall of Asia Arena karong  October 3. Segurado matud pa nga mahurot kini sulod karong semanaha.

Derek wala sa bag-ong poster

Wala ang dagway ug pangalan ni Derek Ramsay sa bag-ong poster sa pelikulang The Janitor nga gibidahan nila ni Dennis Trillo.

Gi-produce kini sa APT Entertainment apan ang Star Cinema maoy mo-release niining maong Cinemalaya entry sa mga sinehan. Bisan wala si Derek sa bag-ong poster niini, nitabang gihapon ang aktor sa pag-promote sa maong pelikula.

“I am part of the movie guys:),” tweet pa ni Derek.

Kahinumduman nga dunay isyu niadto si Derek sa Star Cinema ug usa kini sa gidudahan nga rason kung nganong wala ang dagway sa aktor sa bag-ong poster sa The Janitor. 

Dunggan ni Justin operahan

Kinahanglan matud pa operahan ang dunggan sa Canadian pop star nga si Justin Bieber gumikan kay naapektohan kini og maayo sa dihang niambak siya  sa taas nga cliff ug kusog kaayo ang impact niini sa tubig hinungdan nga nadaot ang iyang eardrum.

“Busted my ear drum cliff diving. Doc says might need surgery now. Sucks,” tweet pa ni Justin.

Gipasalig hinuon ni Justin ngadto sa iyang fans nga makapadayon gihapon siya sa pagkanta bisan pa man sa iyang kahimtang.

“My ear drum might back us up a little but I’m still bringing you this new music. Much love. Damn u cliff diving!” dugang pa ni Justin.

Suma pa nga dili kini ang unang higayon nga niambak siya sa taas nga cliff. Gibuhat usab niya kini sa miaging tuig didto sa Kauai, Hawaii.