PGT 4 grand winner damang-dama ang buhay ni Annaliza

MANILA, Philippines - Dama ang kanyang masalimuot na pinagdaanan sa buhay bago nakamit ang tagumpay, bibigyang buhay ng Pilipinas Got Talent 4 grand winner na si Roel Manlangit ang theme song ng hit primetime family drama na Annaliza.

Kamakailan ay sumabak na sa recording ang kilalang YouTube sensation at mapapakinggan na ang sarili niyang interpretasyon ng awitin sa mga umeereng episodes ng soap na tinatampukan ng rising teleserye princess na si Andrea Brillantes.

Inawit din ni Roel ng live ang nasabing theme song sa ginanap na Bida Kapamilya show noong Sabado sa Valenzuela Astrodome.

Samantala, mas titindi na ang mga tagpo sa Annaliza ngayong linggo dahil sa paglamig ng pakikitungo ni Stella (Kaye Abad) kay Annaliza matapos malamang siya ang anak nina Lazaro (Patrick Garcia) at Isabel (Denise Laurel).

Mababaon din sa utang ang kanilang pamilya kaya naman magdedesis­yon si Guido (Zanjoe Marudo) na makipagsapalaran sa ibang bansa. Paano makakaahon sina Annaliza sa dagok na ito? Ano ang naghihintay kay Annaliza sa kamay ni Stella sa oras na mawala si Guido? Huwag palalampasin ang Annaliza gabi-gabi, bago mag-TV Patrol, sa Primetime Bida ng ABS-CBN.