Beterano ang winners

Manila, Philippines --- Mga beteranong artista ang gihatagan og pasidungog sa milabay’ng Cinemalaya Philippine Independent Film Festival. Si Eddie Garcia sa pelikulang Bwakaw ang midaog isip Best Actor sa Director’s Showcase. Si Amable Quiambao pud sa pelikulang Diablo ang Best Actress sa New Breed category.

Si Anita Linda sa Santa Nina ang midaog nga Best Supporting Actress sa New Breed category. Standing ovation ang tibuok theater dihang si Anita na ang midaog.

Nakatawa ang tanan nga midaog pa siya sa New Breed. Sa edad nga 88, padayon pa gihapon matud pa siya sa paghimo og pelikula ug kaya pa niyang mu-arte atubangan sa camera.

Nagubot ug naglibog kay sayup ang script

Nagkagubot ug naglibog ang tanan dihang gitawag ang winner sa Best Supporting Actress sa Director’s Showcase.       

Gitawag sa host nga si Jonathan Tadioan nga winners sa maong kategorya sila si Judy Ann Santos, Iza Calzado, Agot Isidro ug Janice de Belen. Mitindog si Bienvenido Lumbrera ug misaka sa stage para korihian kini. Ang gitawag niyang winner mao si Anita Linda nga sayop pud kay sa New Breed category man kini, dili sa Director’s Showcase.

Si Ricky Lee nga lakip sa mga hurado ang mikorihi ug nangayo og dispensa sa kasaypanan.

Mao diay kay ensemble acting kadtong ilang pagdaog ni Judy Ann, Iza, Agot ug Janice sa Mga Mumunting Lihim—sila maoy winner alang sa Best Actress ug Best Supporting Actress categories. Wala matarong sa script busa naglibog dihang gitawag na ang winners. Maayo na lang kay natarong kini sa awarding na mismo. Bugtong si Iza lang ang nakatambong aron pagdawat sa ilang award.   - BANAT NEWS