Kapuso stars ug GMA News personalities mobisita sa Sugbo

CEBU, Philippines - Magbaha ang mga artista sa GMA-7 ugma sa hapon alang sa usa ka show diha sa SM City- Consolacion kung diin makighimamat sa ilang mga fans ang mga bituon sa bag-ong serye sa GMA nga Hindi Ka Na Mag-iisa. Kini naglangkob nila ni Jennylyn Mercado, Sid Lucero, Crystal Reyes, Carl Guevarra, Frank Magalona ug Saab Magalona. Sa dili pa sila motikang sa SM City Consolacion, mohapit una sila sa Kapuso Barangayan diha sa Tisa Covered Court sa ala 1 sa hapon ug Tejero Covered Court sa alas 3 sa hapon. Samtang inigkaabot sa Domingo sa buntag,mahitabo ang Kapuso Barangayan with Serbisyong Totoo Activities diha sa Hipodromo Covered Court kung diin moduaw ang mga pipila ka personalidad sa GMA News and Public Affairs nga sila si Howie Severino, Kara David, Sandra Aguinaldo ug Jay Taruc. Sa alas 12 sa udto hangtud sa alas 6 sa gabii motikang ang mga nahisgutang personalidad sa SM City Cebu- Cinema 7 alang sa I-Witness Docufest 2012.

Pang eleksyon?

Nabanhaw pag-usab ang mga tsismis kabahin nila ni Heart Evangelista ug Senator Chiz Escudero human sila nakit-an nga namahaw sa Greenbelt. Pabor na pabor kang Senator Chiz ang sighting kanila ni Heart kay musamot ang kasikas sa iyang name. May recall na siya sa mga botante sa 2013 elections. I'm sure, may ubang mga pulitiko nga type pud nga ma-link sila sa mga artista para mahisgutan pud ang ilang mga ngalan, sa ngalan sa eleksyon sa sunod tuig. Lolit Solis/PSN