Limang milyon ipinamigay ng GMA last Christmas

MANILA, Philippines - Mahigit P5 million cash at iba’t ibang prizes tulad ng motorcycles, scholarships, at kabuhayan showcase ang naipamigay sa katatapos na Puso Ng Pasko Artista Challenge ng GMA 7, ang kauna-unahang Christmas reality series sa Philippine TV.

Sa final challenge na napanood noong Biyernes, December 31, nanalo ng isang tricycle at P100,000 cash ang pamilya ni Violeta Guevarra sa tulong nina celebrity challengers Raffy Tima at Mariz Umali.

Halagang P50,000 ng kabuhayan showcase at P50,000 cash naman ang nakuha ng pamilya ni Alex Jesus Bautista sa tulong ng second place celebrity challengers na sina Ervic Vijandre at Heart Evangelista. Ang third prize – P20,000-worth groceries plus P5,000-worth appliances at P25,000 cash – ay napanalunan ng pamilya ni Cris Valdez, sa tulong nina Cesar Montano at Sunshine Cruz.

Nauna nang nanalo ang pamilya ni Teresa Martinez at ang San Jose Montalban Rizal community ng P100,000 at isang STI scholarship (para sa partner family), at 1,000 pares ng sapatos (para sa partner community) sa tulong ng celebrity challengers na sina Aljur Abrenica at Bianca King. P100,000 at isang motorcycle ang napanalunan ni Jonathan Manaois at 100 bikes para sa partner community ang naibigay sa tulong nina celebrity challengers Carl Guevarra at Jennica Garcia.

Ang pamilya at komunidad ni Alex Jesus Bautista taga-Joan of Arc, Gulod, Novaliches Quezon City naman ang nanalo ng P100,000 at P150,000-worth ng kabuhayan showcase (partner family) at 500 half-sacks of rice (partner community) sa tulong nina Ervic at Heart.

Nanalo na rin ang pamilya at komunidad ni Violeta Guevarra Purok 4, Zone 8, Cupang, Antipolo City na tumanggap ng P100,000 at isang STI scholarship (partner family), at 1,000 pares ng sapatos (partner community) sa tulong nina celebrity challengers Raffy at Mariz; at ang pamilya at komunidad ni Tess Carolino ng Talipapa, Novaliches Q.C. na nagwagi ng P100,000 at isang motorcycle (partner family), at 100 bikes (partner community) sa tulong nina celebrity challengers Mike Tan at Sam Pinto.