Condo owners binalaan sa aktibidad ng mga dayuhang tenants
NAGAGAMIT daw ang ilang condo sa Metro Manila sa cryptocurrency scam operations.
Kaya nga umapela na ang Bureau of Immigration (BI) sa mga may-ari, operators at administrators ng mga condominium buildings na iulat sa kanila ang mga kahina-hinala o mga iligal na aktibidades ng mga dayuhan nilang tenants.
Ito kasi ang nabunyag sa isinagawang pagdinig sa Senado na ilang mga condo units sa Metro Manila ginagawang kuta ng mga cryptocurrency scam syndicates.
Nahihirapan umano ang BI, maging ang mga awtoridad na pasukin ang mga ito, dahil nga sa residential areas, na hindi tulad ng mga opisina ng mga kompanya.
Hinikayat ni BI commissioner Norman Tansingco ang mga condo owners na tulungan sila para masawata ang trafficking sa bansa, sa pamamagitan na iulat sa kanila ang mga ilegal na aktibidades sa kanilang mga lugar.
Isang Indonesian national kasi ang nagbulgar patungkol dito na matapos niyang dumating sa bansa dinala siya sa isang condo sa Pasig City. Doon umano niya nakita ang marami pang bilang ng mga dayuhan, kung saan inatasan silang hikayatin ang kanilang mga kababayan na mag-invest sa cryptocurrencies.
Nakakatakot ang ganito lalo na dun sa mga condo unit owners na ipinauupa ang kanilang mga pag-aari lalu na sa mga dayuhan.
May babala nga ang BI sa mga condo owners na mabibigong iulat ang aktibidad ng mga dayuhan sa kanilang mga pag-aari na ito ay maaaring ituring na ‘harboring illegal aliens’ sa ilalim ng Philippine Immigration Act of 1940 kapag nadiskubre na kinukunsinti ang operasyon.
Dapat din sigurong maging maingat sa pagpapaupa lalu na sa mga condo unit owners, na dahil sa maayos naman ang naibabayad sa kanila, wala nang pakialam kahit anong gawin ng kanilang mga tenants.
Huli na nang malalaman nila na nagamit ang kanyang ari-arian sa ilegal na aktibidades.
Yan ang dapat na mabantayan, baka sa huli pati kayo ay madamay.
- Latest