Ang pelikulang nanghula ng petsa ng kamatayan
NAALAALA pa ba ninyo ang nakakatakot na pelikulang Poltergeist noong 1982? Ang theater poster ng pelikulang ito ay ganito: Isang batang babae ang nakaharap sa TV na pulos liwanag lang ang nakikita. Sa tunay na buhay, ang pangalan ng batang ito ay Heather O’Rourke. Mga 6 or 7 years old siya nang gawin ang pinakaunang Poltergeist. Nasundan kasi ito ng Poltergeist II and III dahil sa sobrang hit ng original na Poltergeist sa takilya.
Ginagampanan niya ang karakter ni Carol Anne na kinidnap ng mga multo. Basta na lang siya pumasok sa loob ng TV set habang ang screen nito ay napupuno ng liwanag.
Ang producer ng pelikulang nabanggit, si Steven Spielberg, ang naka-discover sa batang si Heather. Sa pelikula, tatlo silang bata na gumanap na magkakapatid—dalawang babae at isang lalaki. Sa isang eksena, habang ang karakter ni Robbie, kuya ni Carol Anne ay nakahiga sa kanyang bedroom, may poster sa ulunan nito na may nakalagay na “1988 Super Bowl XXII”.
Walang kinalaman ang Super Bowl sa pelikula ngunit nakapagtataka na iyon ang napili ng production staff na gawing room decoration ng batang karakter. Idagdag pa na sobrang advance ang advertisement dahil noon ay 1982 pa lang.
Noong January 31, 1988, sa bahay ni Heather sa San Diego California, excited ang mag-anak dahil iyon ang araw ng Super Bowl sa San Diego. Pero hindi sila natuloy ng panonood dahil sumama ang pakiramdam ni Heather.
Kinabukasan, bago dalhin sa ospital ay hinimatay siya. Pagsapit ng hapon ay nalagutan siya ng hininga. Pumanaw siya sa edad na 12. Iyon pala ang ibig sabihin ng Super Bowl poster na aksidenteng nakuhanan sa pelikula—taon (1988) kung kailan mamamatay ang batang bida.
- Latest